16 მილიარდი დოლარიდან 30 მილიარდ დოლარამდე გაიზარდა საქართველოს ეკონომიკა მხოლოდ ბოლო სამი წლის განმავლობაში. როდესაც ეკონომისტი ამტკიცებს, რომ ეს 14 მილიარდი დოლარი წავიდა 20-25 კაცის ჯიბეში, უბრალოდ მან არ იცის ეკონომიკა, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.
კობახიძემ კომენტარი გააკეთა გიორგი გახარიას იმ განცხადებაზე, რომლის მიხედვითაც, „გაზრდილი ეკონომიკა 20-25 ოჯახის ჯიბეში მიდის“.
ირაკლი კობახიძის თქმით, ზოგადად, გახარია ბოლო წლების განმავლობაში ტყუილებით გამოირჩეოდა.
„გახარია ეკონომიკის მინისტრი იყო, არ მახსოვს ეკონომისტია თუ არა, მაგრამ იყო ეკონომიკის მინისტრი. ვინც ოდნავ ერკვევა ეკონომიკაში, ის უბრალოდ ასეთ სამარცხვინო განცხადებას არ გაკეთებს. ეკონომიკა იზრდება და თან იზრდება მასშტაბურად, იცით, რომ 16 მილიარდი დოლარიდან 30 მილიარდ დოლარამდე გაიზარდა საქართველოს ეკონომიკა მხოლოდ ამ სამი წლის განმავლობაში და როდესაც ეკონომისტი ამტკიცებს, რომ ეს 14 მილიარდი დოლარი წავიდა 20-25 კაცის ჯიბეში, უბრალოდ მან არ იცის ეკონომიკა. ამით შეიძლება, მოატყუო საზოგადოების გარკვეული ნაწილი, მაგრამ თავმოყვარეობის ამბავია, რომ ადამიანმა, რომელსაც ერქვა ეკონომიკის მინისტრი, სამარცხვინო ტყუილი არ აკადროს საზოგადოებას. სინამდვილეში, ეკონომიკის ზრდა არ ნიშნავს, რომ ფულის მასა იმატებს, ეკონომიკის ზრდა ნიშნავს, რომ ვითარდება ეკონომიკის სხვადასხვა სფერო, ვითარდება წარმოება, მომსახურება და ასე შემდეგ. რა თქმა უნდა, ფიზიკურად შეუძლებელია, რომ ეს ყველაფერი გადანაწილდეს 20-25 ოჯახზე, მით უმეტეს, რომ მას საერთოდ არ ჰქონია საუბარი არც გვარებზე, არც არაფერზე. ეს არის ცარიელი ტყუილი. გახარიას ჩვევია ზოგადად ასეთი ტყუილების ლაპარაკი, ის გამოირჩეოდა ზოგადად ტყუილებით ბოლო წლების განმავლობაში. გახსოვთ, რაზე ააგო მან თვითმართველობის არჩევნების დროს საკუთარი საარჩევნო კამპანია, ვითომ ის იყო ბიძინა ივანიშვილის რჩეული და ასე შემდეგ. ჩვეულებრივი მატყუარაა, ამ შემთხვევაში უბრალოდ, ადამიანმა, რომელსაც ერქვა ეკონომიკის მინისტრი, საკუთარ თავს არ უნდა აკადროს სამარცხვინო ტყუილი“, – განაცხადა ირაკლი კობახიძემ.