ვანში „ევროპული საქართველოს“ ადგილობრივი ორგანიზაციის ლიდერი კ.ძ. არასრულწლოვანი გოგოს მიმართ იძულების ბრალდებით დააკავეს.
არსებული ინფორმაციით, კ.ძ.-მ გზაზე მიმავალი გოგო მანქანაში ჩაისვა. სავარაუდოდ, მან არასრულწლოვანს სექსუალური ხასიათის რამდენიმე შეკითხვა დაუსვა, ასევე, სთხოვა ტელეფონის ნომერი. ინციდენტის შემდეგ, გოგო თავად მივიდა პოლიციაში და მომხდარის შესახებ განაცხადა, რასაც ძაგნიძის დაკავება მოჰყვა.
როგორც „იმედინიუსს“ შინაგან საქმეთა სამინისტროში განუცხადეს, დაკავებულია საქართველოს მოქალაქე კ.ძ. სისხლის სამართლის კოდექსის 150-ე მუხლით, რაც იძულების გულისხმობს.
„იმედინიუსს“ „ევროპულ საქართველოში“ დაუდასტურეს, რომ აღნიშნული პირი მათი პარტიის წევრია და განმარტეს, რომ კომენტარს მოგვიანებით გააკეთებენ.
კანონმდებლობის თანახმად, დანაშაული ისჯება ჯარიმით, ან გამასწორებელი სამუშაოთი ვადით ერთ წლამდე, ან შინაპატიმრობით ვადით ექვსი თვიდან ორ წლამდე, ან თავისუფლების აღკვეთით ვადით ერთ წლამდე.