„კატარგეითის“ კორუფციული სკანდალის მთავარი ფიგურანტი, ევროპარლამენტის ყოფილი ვიცე-პრეზიდენტი ევა კაილი ცდილობდა, ევროპარლამენტის პრეზიდენტი რობერტა მეცოლა კატარში, მსოფლიო ჩემპიონატზე ჩაეყვანა – ამის შესახებ წერსგამოცემა Politico, რომელმაც საქმის მასალებზე მოიპოვა წვდომა.
დაკავების შემდეგ ევა კაილიმ პოლიციას განუცხადა, რომ მას უბრალოდ სურდა, დაემყარებინა დიალოგი ევროკავშირსა და კატარს შორის, და ევროპარლამენტის პრეზიდენტი რობერტა მეცოლა კატარში გასამართ მსოფლიო ჩემპიონატზე ჩაეყვანა.
„ქალბატონო პრეზიდენტო, უნდა გადგმოცეთ მიწვევა მსოფლიო ჩემპიონატზე, რომელმაც შეიძლება თქვენი მეუღლე და შვილებიც დააინტერესოს“, – ნათქვამია ევა კაილის მიერ მეცოლასთვის 12 ნოემბერს WhatsApp-ში გაგზავნილ შეტყობინებაში.
კაილიმ მეცოლასთვის გაგზავნილი 12 შეტყობინებიდან 11 წაშალა და დატოვა მხოლოდ ერთი, რომელშიც ეწერა – „დანარჩენს არც მე ვეთანხმები, მაგრამ მჯერა, რომ ისინი მოინელებენ ამას, თუ ვიზას მივიღებთ“. როგორც Politico წერს, ეს შეტყობინება შეიძლება უკავშირდებოდეს კატარის მცდელობებს, ევროკავშირთან უვიზო მიმოსვლა დაემყარებინა. 2022 წლის დეკემბერში ვიზალიბერალიზაციის შეთანხმებს ევროპარლამენტის სამოქალაქო თავისუფლებების კომიტეტმა დაუჭირა მხარი, თუმცა კორუფციული სკანდალის გამო საკითხზე საბოლოო კენჭისყრა გადაიდო.
ევა კაილიმ პოლიციას განუცახდა, რომ შეტყობინებების წაშლა მისთვის ჩვეულებრივი პრაქტიკაა. რობერტა მეცოლას პრესმდივანმა კი აღნიშნა, რომ ევროპარლამენტის პრეზიდენტს ევა კაილის შეტყობინებები არ უნახავს და შემდეგ კი კაილიმ ეს შეტყობინებები თავად წაშალა. მისივე განცხადებით, რობერტა მეცოლას არ აუღია ვინმესგან მსოფლიო ჩემპიონატის ბილეთები და „მან უარი თქვა კატარში გამგზავრებაზე ქვეყანაში ადამიანის უფლებების კუთხით არსებული მძიმე ვითარების გამო“.