ქუთაისის საკრებულოში „ნაციონალურ მოძრაობის“ შვიდმა წევრმა და პარტიის აქტივის ნაწილმა პარტია დატოვეს. ისინი აცხადებენ, რომ „ნაციონალურ მოძრაობაში“ არაფორმალური მმართველობაა.
„მიმდინარე წლის დასაწყისში ჩატარებული არჩევნების შემდეგ მივიღეთ სამწუხარო რეალობა, იმთავითვე შეუსრულებლობისთვის განწირული დაპირებით, ანუ სიცრუით სათავეში მოვიდა მენეჯმენტი, რომელმაც პარტიას ჩამოაცილა გამოცდილი, ერთგული კადრები, მოახდინა მათი სრული იგნორირება. იმის პარალელურად, რომ პარტიის მართვის ბერკეტებთან წამოატივტივა პარტიიდან პარტიაში პირადი გამორჩევის მიზნით მომთაბარე პოლიტიკოსები, მათ შორის, მიხეილ სააკაშვილის უკიდურესი ლანძღვით გამორჩეული პოლიტიკოსები, „ერთიანი ნაციონალური მოძრაობა“ შეგნებულად დააყენეს კომფორმისტულ, სისტემურ, ფსევდოოპოზიციურ წარმონაქმნად გადაქცევის გზაზე“, – განაცხადა „ერთიანი ნაციონალური მოძრაობიდან“ ქუთაისის საკრებულოს წევრმა დავით ბახტაძემ.