ჩვენ კიდევ ერთხელ გადავუხადეთ ოლივერ ვარჰეის მადლობა მისი ძალიან კონკრეტული და ძალიან ღირებული კონტრიბუციისთვის, მან კი მოგვცა პოზიტიური შეფასებები საქართველოს მიერ გადადგმულ ნაბიჯებთან დაკავშირებით, – ამის შესახებ ჟურნალისტებს საგარეო საქმეთა მინისტრმა, ილია დარჩიაშვილმა განუცხადა.
„ოლივერ ვარჰეისთან ტრადიციულად გვქონდა ძალიან საინტერესო შეხვედრა. ჩვენ კიდევ ერთხელ გადავუხადეთ მას მადლობა მისი ძალიან კონკრეტული და ძალიან ღირებული კონტრიბუციისთვის. ჩვენ ვიცით, რომ ბოლო პერიოდში ევროკომისია ძალიან აქტიურად მუშაობდა ჩვენთან ერთად იმისთვის, რომ ეს პროგრესი მიგვეღო. ჩვენ დავაფიქსირეთ მადლიერება ევროკომისრის მიმართ, მან მოგვცა კონკრეტული გზავნილები და პოზიტიური შეფასებები საქართველოს მიერ გადადგმულ ნაბიჯებთან დაკავშირებით. მისგან კიდევ ერთხელ მოვისმინეთ, რომ ევროკომისიისგან რეკომენდაციის მიღების მიუხედავად და ეს ჩვენს პოზიციასთანაც თანხვედრაშია, ჩვენ უნდა გავაგრძელოთ ეს პროცესი. რეფორმირების ამბიციური დღის წესრიგი არ შეიძლება ჩატარდეს ერთ ან ორ წელიწადში, ეს არის განგრძობადი პერიოდი და ჩვენმა ხელისუფლებამ არაერთხელ დაამტკიცა, რომ ჩვენ სწორედ გრძელვადიან პერსპექტივაში ვუყურებთ საქართველოს განვითარებას, რეფორმების განხორციელებას. ეს არის მთავარი იმპულსი იმისათვის, რომ ჩვენ მივაღწიოთ საბოლოო მიზანს და გავხდეთ ამ დიდი ოჯახის სრულფასოვანი წევრები“, – აღნიშნა მინისტრმა.