გაუგებარია რა უნდა ოპოზიციას და შესაბამისად, ხალხსაც აღარ ესმის თქვენი, რა გინდათ. საუბარი იყო იმაზე, როგორ შევა ისტორიაში „ქართული ოცნება“. „ქართული ოცნება“ ისტორიაში უკვე შევიდა იმიტომ, რომ სწორედ ამ ხელისუფლების დროს მოხდა რატიფიცირება, ვიზა-ლიბერალიზაცია და ეს ნამდვილად ისტორიული გადაწყვეტილებაა, მაგრამ თქვენ შეხვალთ ისტორიაში, როგორც გაუგებარი პოლიტიკური წარმონაქმნები, რომელსაც რა უნდათ აღარ ვიცით, – ამის შესახებ გარემოს დაცვისა და ბუნებრივი რესურსების კომიტეტის თავმჯდომარე, საპარლამენტო უმრავლესობის წევრმა, მაია ბითაძემ პარლამენტის პლენარულ სხდომაზე განაცხადა.
მაია ბითაძის თქმით, ოპოზიცია საერთოდ არ ადევნებს იმ პროცესებს თვალს, რომლის მონაწილეც საქართველოა.
„დღეს, ერთი ორი გამომსვლელისგან ყურში მომხვდა, რომ მათ ისევ ძალიან უნდათ ომის დაწყება, ეს მკაფიოდ იქნა ნათქვამი. თქვენი ასეთი ნარატივი ყოველთვის ხდება იმის მიზეზი, რომ საბოლოო ჯამში ამომრჩეველი თქვენ აღარ გენდობათ. საუბარი იყო იმაზე, რომ თურმე „ქართული ოცნება“ დისტანცირდა ჩვენი ევროპელი პარტნიორებისგან. ეტყობა არ უყურებთ საინფორმაციოებს, ან მიზანმიმართულად ამახინჯებთ პროცესებს. დღესაც, თქვენი კოლეგა, კომიტეტის თავმჯდომარე იმყოფება ბუნდესტაგში, დღეს საგარეო საქმეთა მინისტრი ილია დარჩიაშვილი იმყოფება ევროკავშირის აღმოსავლეთ პარტნიორობის მინისტერიალზე, რამდენიმე დღის წინ ბატონი ირაკლი ბერაია, საპარლამენტო და სამთავრობო გუნდი ერთად იმყოფებოდნენ ნატო-საქართველოს კომისიის სხდომაზე. საერთოდ არეულები ხართ, თანმიმდევრულობა დაკარგეთ. დღეს მოვისმინეთ საკითხები, რომელიც დაკავშირებულია, რატომ არ შეიქმნა ქოლცენტრებთან დაკავშირებით საგამოძიებო კომისია მაშინ, როდესაც ამ საკითხთან დაკავშირებით საგამოძიებო ორგანოები ინტერპოლთან ერთად მუშაობენ. „რატომ არ უსმენთ მასწავლებლებს“- და ამ დღეებში ვისმენთ განცხადებებს, რომ მასწავლებლებს თურმე ხელფასები ემატებათ და ზოგადი განათლების სფეროში გარკვეული რეფორმები იგეგმება, რომელზეც დღეს მინისტრი გააკეთებს განცხადებებს. ასევე, საერთოდ არ ადევნებთ პროცესებს თვალს, რომლის მონაწილე საქართველოა. გასულ კვირაში საქართველოს პრემიერ-მინისტრი იმყოფებოდა კლიმატის სამიტის 28-ე კონფერენციაზე, სადაც მნიშვნელოვანი განცხადებები გააკეთა ჩვენი საერთაშორისო პროცესებში მონაწილეობასთან დაკავშირებით, მათ შორის, დეკარბონიზაციასთან მიმართებით და კითხვას რომ სვამთ-„ვერ გავიგეთ რა უნდა ოცნებასო“ იმიტომ ვერ გაიგეთ და იმიტომ ვერ ქმნით დღის წესრიგს, რომ არ ერკვევით საკითხებში. როდესაც ერთ-ერთ ოპოზიციონერს მოვუწოდე, საკითხებში გაერკვიეთმეთქი დედაქალაქის ტრანსპორტთან დაკავშირებით, ძალიან დიდი ბოდიში, მაგრამ ისეთი სისულელეები ისაუბრა, რომ საერთაშორისო ორგანიზაციების აღშფოთებაც დაიმსახურა. ასე რომ, ნაცვლად იმისა, რომ დეკლარაციული განცხადებები აკეთოთ, რომელიც არავის აღარ სჯერა, მგონი დროა, პროცესებში რეალურად მიიღოთ მონაწილეობა, ან საერთოდ უარი თქვათ პარლამენტზე და მოსახლეობას პარლამენტიდან კი ნუ ეხვეწებით ხმა მოგვეცითო, არამედ კარგად გაერკვეთ თქვენ რა გინდათ – ომი გინდათ, ევროკავშირში გაწევრიანება გინდათ, თუ საერთოდ გინდათ გაერკვიოთ, რას ნიშნავს თანამედროვე მმართველობითი მექანიზმები“.-განაცხადა მაია ბითაძემ.