მაქვს შეგრძნება, რომ ამ დარბაზში არიან ადამიანები, რომლებიც ქართულ ტოლერანტობას, კულტურათა დიალოგს და ყველაფერს იმას, რასაც შერიგებისა და სამოქალაქო თანასწორობის საკითხებში სახელმწიფო მინისტრის აპარატი აკეთებს, აკნინებენ, რადგან წარმოადგენენ რაღაც ინტერესს, რაც მთავარია, საკუთარი გამორჩენის მიზნით, – ამის შესახებ საპარლამენტო უმრავლესობის წევრმა, ბექა ოდიშარიამ სახელმწიფო მინისტრ თეა ახვლედიანის პარლამენტში მოსმენასთან დაკავშირებით, ოპოზიციის წარმომადგენლების მისამართით განაცხადა.
ოდიშარიას თქმით, ოპოზიციის წარმომადგენლები ისე სვამენ კითხვებს, რომ რეალურად არ გაცნობიან მინისტრის მოხსენებას.
„რამდენი რამის მოსმენა შეიძლება, არ ვიცი, ბევრი სისულელის, მათ შორის იმის, თითქოს თეა ახვლედიანს პრობლემა აქვს ჟურნალისტებთან, საზოგადოებასთან ურთიერთობის ან ხედვა არ აქვს და ა.შ. არ დავუშვებ, ჩემმა კოლეგამ უბრალოდ იმისთვის იმართლოს თავი, რომ არ გაფრენილა კოსმოსში ან კიდევ სხვა რამ. ამ ადამიანთან აბსოლუტურად ღია არის კარი, მათ შორის ნებისმიერი საკითხით დაინტერესებული, ნებისმიერი პარტიული ინტერესით ანგაჟირებული ადამიანისთვის. არ მგონია, თქვენ ისე გაგერჩიოთ ეს მოხსენება, როგორც მე გავარჩიე, თორემ არ დასვამდით ამდენ შეკითხვას, რომლებიც საერთოდ აცდენილია აქაურობას. რა ხედვა არ აქვს, ამდენი რამ ილაპარაკა, თუ უსმენთ, მოუსმინეთ. ადამიანმა თქვა, როგორ პოლიტიკას ახორციელებს. „ქართულ ოცნებას“ რომ აბრალებენ, თითქოს ჩვენ გადავეცით მებრძოლების რაღაც სიები, ამ საზიზღრობას რომ ავრცელებთ საზოგადოებაში და მეორე მხრივ, თქვენი მომხრეები იქ, ღობის გასწვრივ რომ დარბიან სინაზე გაბმული ძაღლებივით და არაფერს აკეთებენ, გარდა იმისა, რომ აზიანებენ სამშვიდობო პროცესს, ადამიანი დაჭერილია და იმაზე იძახიან, რომ ეს იყო 2008 წლის გმირი, ვითომ იმ წუთას ეს შველოდეს იმ ადამიანს, გარდა იმისა, რომ აზიანებდეს. ოპოზიციას ბევრჯერ მივცეთ სიტყვა, რადგან იმდენ რამეს იძახიან, თუ რა პოლიტიკურ ლანდშაფტში და რა ჭაობშიც არიან
მინდა, ორი შეკითხვა დავსვა: რამდენად ხედავთ მავნებლობას? ყოველგვარი რიტორიკის გარეშე გეუბნებით. ჩვენ გვაქვს მცდელობა, სუსს, თქვენ, შსს-ს და სხვა სტრუქტურებს სხვადასხვა ფორმატში უკანონოდ გატაცებული ადამიანების დაბრუნების, რა 1 100 ადამიანი და რა 1 600 ადამიანი? 500 ერთ დღეს მოკლეს და დაკარგულ 200 სოფელს ქვების გროვა უწოდეს, ახლა სტკივათ თურმე გული. ვიდრე სპეციალური საზღვრებით არ შემოსაზღვრეს და ავტონომიური რესპუბლიკა არ აღადგინეს, ზემო აფხაზეთი არ უწოდეს კოდორს, მანამდე რაღაც არ მახსენდება, ამხელა სტატისტიკა ყოფილიყო, ასეთი ნეგატიური და უარყოფითი. პირდაპირ ხელი გაუწოდეს იმისთვის, რომ ეს ყველაფერი მომხდარიყო. ეს რამდენად აზიანებს? მეორე, გთხოვთ, არ გაუტაროთ. ამ დარბაზშიც კი მაქვს შეგრძნება, რომ არიან დაფინანსებული ადამიანები სხვა სახელმწიფოს ინტერესებით, რომლებიც ქართულ ტოლერანტობას, კულტურათა დიალოგს და ყველაფერს იმას, რასაც თქვენი სამინისტრო აკეთებს, აკნინებენ, არა ობიექტური გულისწუხილით, არამედ იმიტომ, რომ წარმოადგენენ რაღაც ინტერესს, რაც მთავარია, საკუთარი გამორჩენის კონკრეტული მიზნით“, – განაცხადა ბექა ოდიშარიამ.