ჩვენი მიზანია შევქმნათ უკეთესი საერთო მომავალი ჩვენი აფხაზი და ოსი ძმებისთვის ჩვენს ერთიან სახელმწიფოში, რომელიც ევროპულია და უზრუნველყოფს მათი უფლებების დაცვას და მათი შესაძლებლობების განვითარებას, – განაცხადა პარლამენტის თავმჯდომარის მოადგილემ ირაკლი ჩიქოვანმა „მინისტრის საათის“ ფორმატში, შერიგებისა და სამოქალაქო თანასწორობის საკითხებში სახელმწიფო მინისტრის, თეა ახვლედიანის მოსმენის დროს.
ირაკლი ჩიქოვანის შეფასებით, სახელმწიფო მინისტრმა უწყების კომპეტენციაში შემავალ საკითხებზე საქმიანი ანგარიში წარადგინა და ის პროგრამები და პროექტები დაასახელა, რომელსაც საქართველოს ხელისუფლება ახორციელებს. მისივე თქმით, მინისტრის ანგარიშის საპასუხოდ, ოპოზიციის მიერ გაკეთებული შეფასებები შერიგების ნაცვლად დაპირისპირებისკენ იყო მიმართული.
„ჩვენ მოვისმინეთ განცხადებები, რომლებსაც საერთო არ ჰქონდა შერიგებასთან, პირიქით, ეს იყო განცხადებები, რომლებიც მიმართული იყო დაპირისპირებისკენ. დაპირისპირებისკენ არა მხოლოდ ჩვენ პოლიტიკურ გუნდთან, არამედ საკუთარ მოქალაქეებთან, საკუთარ სახელმწიფოს მომავალთან და ქვეყნის სტრატეგიულ და უმთავრეს მიზანთან. სამწუხაროდ, დღეს ოპოზიციამ დაგვანახა, რომ ისინი უპირისპირდებიან მთავარ მიზანს – ჩვენი ქვეყნის გაერთიანებას და ჩვენი თანამოქალაქეების, ჩვენი აფხაზი და ოსი ძმების შემორიგებას.
რა მიზანი გვაქვს ჩვენ? ჩვენი მიზანია, შევქმნათ უკეთესი საერთო მომავალი ჩვენი აფხაზი და ოსი ძმებისთვის ერთიან სახელმწიფოში და ვიდრე ამ დიდ მიზანს მივაღწევთ ყოველდღე ვიმუშაოთ უფრო მეტი კონტაქტის დამყარებაზე. ეს აუცილებელია იმისთვის, რომ ჩვენ ერთმანეთთან ნდობა აღვადგინოთ, მეტი კომუნიკაციის საშუალება და ერთმანეთთან მისასვლელი ბევრი გზა გვქონდეს. დიახ, ამის ხელშეწყობისკენ არის მიმართული ყველა ის ძალისხმევა, რომელსაც სახელმწიფო მინისტრის აპარატი ახორციელებს. ამის ხელშეწყობისკენ არის ყველა ის კომუნიკაცია და კონტაქტი, რომელიც ჩვენი გუნდის წევრებს აქვთ.
მინდა ერთ რამ ვისურვო, მინდა, თქვენი თანამდებობა საერთოდ არ არსებობდეს, ქალბატონო თეა. მე ასეთ საქართველოში მინდა ვიცხოვრო. ეს არის ჩემი სანუკვარი ოცნება და დარწმუნებული ვარ, თითოეული ჩემი კოლეგისაც, მაგრამ ვიდრე ეს უწყება არსებობს და ამ უწყებას ხელმძღვანელობთ თქვენ და თქვენისთანა მაღალი პროფესიონალიზმის და პატრიოტული შეგრძნების მქონე ადამიანები, მსურს, წარმატებები გისურვოთ საქმიანობაში“, – განაცხადა ჩიქოვანმა.