“ქვეყნის მთავრობის მეთაური აგზავნის წერილს ევროკავშირში და ამ დროს გამოდიან და აკრიტიკებენ ამ წერილს”

ქვეყნის მთავრობის მეთაური აგზავნის წერილს ევროკავშირში და შენ გამოდიხარ და აკრიტიკებ ამ წერილს ყოველგვარი საბაბის გარეშე – აქ ჩანს, რომ მათი [რადიკალური ოპოზიცია] ერთადერთი თვითმიზანია, საქართველომ როგორმე კანდიდატის სტატუსი არ მიიღოს, – ამის შესახებ ჟურნალისტებს „ქართული ოცნების“ თავმჯდომარემ, საპარლამენტო უმრავლესობის ლიდერმა, ირაკლი კობახიძემ განუცხადა.

„ქვეყნის მთავრობის მეთაური აგზავნის წერილს ევროკავშირში და შენ გამოდიხარ და აკრიტიკებ ამ წერილს ყოველგვარი საბაბის გარეშე. ასეთ დროს, პირდაპირ ჩანს, რომ მათ აქვთ ერთადერთი თვითმიზანია – რამენაირად დააზიანონ ეს პროცესი, რომელიც დაკავშირებული კანდიდატის სტატუსის მიღებასთან. აქ ხომ მაინც შეიძლება გაჩუმდე, როცა შენი ქვეყნის პრემიერი მიმართავს ევროკავშირს, როგორ შეიძლება გამოხვიდე კრიტიკული განცხადებებით, როცა საბაბიც კი არ გაქვს ამისთვის“, – აღნიშნა კობახიძემ.

საქართველოს პრემიერ-მინისტრმა ირაკლი ღარიბაშვილმა ევროპული საბჭოს პრეზიდენტს, შარლ მიშელს, ევროკომისიის პრეზიდენტს, ურსულა ფონ დერ ლაიენს, ევროკავშირის თავმჯდომარე ქვეყნის – ესპანეთის სამეფოს პრემიერ-მინისტრს პედრო სანჩესს, ასევე ევროკავშირის წევრი ყველა სახელმწიფოს ლიდერს საქართველოსთვის ევროკავშირის წევრობის კანდიდატის სტატუსის მინიჭების თაობაზე წერილობით მიმართა.