პლასტიკურ-რეკონსტრუქციული ქირურგიის დეპარტამენტის ხელმძღვანელის, ალექსანდრე კალანტაროვის განცხადებით, პიტბულის მიერ დაკბენილი 2 წლის ლაზარეს ჯანმრთელობის მდგომარეობა პოსტოპერაციულ პერიოდში სტაბილურია.
ექიმის თქმით, მომდევნო ერთი კვირა მნიშვნელოვანია, რათა გადანერგილ ქსოვილში აღდგენითი პროცესები დაიწყოს.
“პაციენტის მდგომარეობა დღეს პოსტოპერაციულ პერიოდში სტაბილურია. ოპერაცია გაკეთდა სასწრაფო ჩვენებით. თავის ქალის საფარი ქსოვილების დეფექტი სიცოცხლესთან შეუთავსებელი იყო. გაკეთდა უნიკალური მიკროქირურგიული ნაფლეთოვანი გადანერგვა. დეფექტის 2/3 დაიფარა, დარჩა დასაფარი 1/3. პირველი კვირა გვაქვს სარისკო პერიოდი, საყურადღებო პერიოდი, ძალიან მნიშვნელოვანია იმისთვის, რომ გადანერგილ ნაფლეთში, გადანერგილ ქსოვილში მოხდეს აღდგენითი პროცესები”, – აცხადებს ექიმი.
ცნობისთვის, ოზურგეთის მუნიციპალიტეტში პიტბულის ჯიშის ძაღლმა ძმები, 5 და 2 წლის ბავშვები რამდენიმე დღის წინ დაკბინა. დაზიანებების სიმძიმის გამო, უმცროს ძმას ოპერაცია დასჭირდა.