გამორჩეული წელი იყო იმ პროგრესიდან გამომდინარე, რაც მიმდინარე პროექტებთან დაკავშირებით ხორციელდებოდა. დასრულებულ მონაკვეთებთან ერთად მაღალი პროგრესია მიმდინარე ობიექტებზეც, – ამის შესახებ რეგიონული განვითარებისა და ინფრასტრუქტურის მინისტრმა ირაკლი ქარსელაძემ „ქრონიკასთან“ განაცხადა.
„წელს 37 კილომეტრი მაგისტრალური გზა გავხსენით, სადაც უმნიშვნელოვანესია 27კმ-იანი მონაკვეთი, რომელიც რიკოთის ორ ძირითად მონაკვეთს მოიცავს, ეს არის ხევი-უბისა-უბისა-შორაპანი. 25 წუთის დაზოგვა ხდება დროის თვალსაზრისით და ეს ყველაფერი ხდება საგზაო უსაფრთხოების საერთაშორისო სტანდარტების დაცვით. მნიშვნელოვანია ის 6-კილომეტრიანი მონაკვეთიც, რომელიც აღმოსავლეთ დასავლეთი მაგისტრალის გრიგოლეთი-ქობულეთის მონაკვეთზე შეემატა. როცა დასრულებულ გზებზე ვსაუბრობთ, ძალიან მნიშვნელოვანია აღინიშნოს თბილისი-საგარეჯოს 35-კილომეტრიანი მონაკვეთი, რომელმაც პირველი ეფექტი უკვე მოგვცა. 2024 წელს რიკოთი და ძირითადი მონაკვეთები უკვე იქნება დასრულებული, რაც უმნიშვნელოვანესია როგორც ქვეყნის ეკონომიკური განვითარებისთვის, ასევე საერთაშორისო რეგიონული მნიშვნელობის თვალსაზრისით, ვინაიდან როდესაც აღმოსავლეთ დასავლეთ დერეფანზე ვსაუბრობთ, ყველას გვახსოვს, რომ ეს არის შემადგენელი ძალიან მნიშვნელოვანი მონაკვეთის – საერთაშორისო მაგისტრალის შუა დერეფნის და ბუნებრივია აღნიშნული პროექტების განვითარება და მათი დასრულება ხელს უწყობს როგორც ამ დერეფნის მიმზიდველობის, ამავე დროს გამტარუნარიანობის მზაობას, რომელიც მონაკვეთების დასრულების შემდეგ გაასამმაგებს შესაბამის გამტარობას. მნიშვნელოვანია ასევე აღინიშნოს ქვეშეთი-კობის ისტორიული პროექტი; მოგეხსენებათ რომ 9-კილომეტრიანი გვირაბის გაყვანა მიმდინარეობს, სადაც 8 კილომეტრზე მეტი უკვე გაბურღულია და გვაქვს მოლოდინები, რომ 2024-2025-ში ეტაპობრივად მონაკვეთები დასრულდება იმდაგვარად, რომ დაგროვილ გამოწვევებზე კომპლექსური პასუხები გაეცემა“, – განაცხადა ქარსელაძემ.