ხვალ ჩანიშნულია ყრილობა. იქამდე იქნება პოლიტსაბჭო, სადაც წარდგენილი იქნება ბატონი ირაკლი კობახიძის კანდიდატურა. შემდეგ უკვე წარედგინება ყრილობას და შერჩეული იქნება კანდიდატად. შემდეგ კვირას უკვე შევეცდებით, რომ პირველივე საგაზაფხულო სესიის კვირაში დავამტკიცოთ ახალი მთავრობა, – ამის შესახებ რეგიონული პოლიტიკისა და თვითმმართველობის კომიტეტის თავმჯდომარის პირველმა მოადგილემ, ირაკლი ზარქუამ განაცხადა.
„მთელი გუნდი ამაყები ვართ, რომ ჩვენი საპარლამენტო წიაღიდან ხდება პრემიერის წარდგენა. იცით რატომ დაერქვა ისტორიული? აქამდე ეს არასდროს ყოფილა. ჩვენ ხომ საპარლამენტო რესპუბლიკა ვართ და შესაბამისად ეს ორმაგად სასიხარულოა. ირაკლის, როგორც არასდროს ისე ექნება მთელი გუნდისა და მთელი მომხრეების მხარდაჭერა“, – აღნიშნა ზარქუამ.
„ქართული ოცნება“ მერვე ყრილობისთვის ემზადება. ხვალ ყრილობაზე, პარტიის ახალ თავმჯდომარეს აირჩევენ. ამ პოსტს ირაკლი ღარიბაშვილი დაიკავებს. პარტიის საპატიო თავმჯდომარე ბიძინა ივანიშვილი კი, პოლიტსაბჭოს პრემიერ-მინისტრობის კანდიდატად ირაკლი კობახიძეს წარუდგენს.
ახალი სამთავრობო გუნდისთვის ნდობის გამოცხადების პროცედურები საკანონმდებლო ორგანოში, მომავალი კვირიდან დაიწყება. ცნობილი გახდება მინისტრთა კაბინეტის ახალი შემადგენლობა.