2024 წლის 9 იანვარს, პარიზის პოლიციის ერთ-ერთ განყოფილებაში, შევიდა საჩივარი ბრალდებით შემდეგი ფორმულირებით: „სექსუალური თავდასხმა დაუცველ პირზე იმ ადამიანის მხრიდან, რომელმაც სამსახურებრივი მდგომარეობა ბოროტად გამოიყენა“.
ჟერარ დეპარდიეს ახალი ბრალდება წაუყენეს. გასულ თვეში, ერთ-ერთმა ქალმა მსახიობის წინააღმდეგ შეიტანა საჩივარი, რომელშიც დეპარდიე სექსუალური ხასიათის ძალადობაშია დადანაშაულებული. 15 თებერვალს „ფრანს პრესი“ გაეცნო რეგიონულ გაზეთ Courrier de l’Ouest-ში გამოქვეყნებულ ინტერვიუს, რომელშიც ეს ქალი (მან თავისი ვინაობის გამჟღავნება არ ისურვა) ამბობს, რომ 2014 წლის მარტში, დუა-ან-ანჟუში (მენი და ლუარას დეპარტამენტი), გადასაღებ მოედანზე, „მთელ სხეულზე დეპარდიეს ხელისგულების შეხება იგრძნო და უცენზურო სიტყვები ჩაესმა“.
საჩივარი ბრალდებით, – „სექსუალური თავდასხმა დაუცველ პირზე იმ ადამიანის მხრიდან, რომელმაც სამსახურებრივი მდგომარეობა ბოროტად გამოიყენა“, – 2024 წლის 9 იანვარს, პარიზის პოლიციის ერთ-ერთ განყოფილებაში შევიდა. Courrier de l’Ouest-ის ცნობით, 24 წლის ყოფილი ასისტენტის ქალის მიერ აღწერილი მოვლენები 2014 წლის მარტში, რეჟისორ ჟან-პიერ მოკის ფილმ „ჯადოქარი და სიამელების“ („Magicien et les Siamois“) გადაღების დროს მოხდა.
2020 წლის დეკემბერში, მსახიობ შარლოტა არნულის საჩივრის საფუძველზე, 75 წლის ჟერარ დეპარდიეს „გაუპატიურებასა და სექსუალურ ძალადობაში“ წაუყენეს ბრალი. არნული დეპარდიეს, 2018 წლის აგვისტოს ბოლოს, პარიზში, მსახიობის სახლში ორჯერ გაუპატიურებაში ადანაშაულებდა. მსახიობ ელენ დარასის საჩივარი კი, რომელიც ჟერარ დეპარდიეს, 2007 წელს, ფილმის გადაღების დროს, სექსუალურ შევიწროებაში სდებდა ბრალს, გასული წლის დეკემბრის ბოლოს ხანდაზმულობის ვადის გასვლის გამო გაუქმდა. 2023 წლის დეკემბერში ესპანელმა ჟურნალისტმა და მწერალმა, რუთ ბაზამ ასევე შეიტანა საჩივარი მის გაუპატიურებასთან დაკავშირებით, რაც, ბაზას მტკიცებით, 1994 წელს პარიზში მოხდა.