უკრაინის თავდაცვითი ძალების უკან დახევის შემდეგ ავდიივკას რუსული არმია აკონტროლებს. საოკუპაციო ძალებმა თითქმის 9 კილომეტრით წაიწიეს წინ, – ნათქვამია ოკუპანტი ქვეყნის თავდაცვის უწყების ოფიციალურ განცხადებაში. მათი მტკიცებით, რუსი სამხედროების მიერ დაპყრობილი ტერიტორიის ფართობი დაახლოებით 32 კვადრატული კილომეტრია. რუსეთმა ავდიივკის დაპყრობის შესახებ მას შემდეგ განაცხადა, რაც უკრაინელმა სამხედროებმა ქალაქი დატოვეს და შემოგარენში ახალ პოზიციებზე გადაინაცვლეს.
„მადლობას ვუხდი თითოეულ მებრძოლს, რომლებიც თავდაცვას ამაგრებენ და იმათაც, ვინც მათ ეხმარება. ბრძოლა გრძელდება და ამ ბრძოლის დროს ჩვენ შეუძლებელსაც ვაკეთებთ, რათა დავძლიოთ რუსული ბოროტება და რაც შეიძლება, მეტი უკრაინელის სიცოცხლე ვიხსნათ. უკრაინელები პირველად არ იბრძვიან გმირულად, მაგრამ მათ პირველად მოიპოვეს მსოფლიო სოლიდარობა და მხარდაჭერა. ავდიივკის საკითხზე ვესაუბრე ჯო ბაიდენს და შევთანხმდით, რომ ამ ვითარებაში ძალიან მნიშვნელოვანია უკრაინის დახმარების გაგრძელება. ნაყოფიერი იყო შეხვედრა შეერთებული შტატების ვიცე-პრეზიდენტთან და კონგრესის ორივე პალატის წარმომადგენლებთან. ამ შეხვედრებმა დაადასტურა მთავარი იდეა – უკრაინას შეუძლია პუტინის შეჩერება და იმ პირობების შექმნა, რომ მან ჩადენილის გამო პასუხი აგოს“, – განაცხადა უკრაინის პრეზიდენტმა ვოლოდიმირ ზელენსკიმ.