“კურიერისთვის” ცნობილი გახდა თუ როგორია ოპოზიციის ჩრდილოვანი კაბინეტის შემადგენლობა – ჩვენი ინფორმაციით, ოპოზიცია პრემიერ-მინისტრის პოსტზე გიორგი ვაშაძეს განიხილავს.
შინაგან საქმეთა მინისტრად დიმიტრი შაშკინს, სახელმწიფო უსაფრთხოების სამსახურის უფროსად ნიკა გვარამიას, თავდაცვის მინისტრად თინა ხიდაშელს, ინფრასტრუქტურის მინისტრის პოსტზე კი მამუკა ხაზარაძეს.
იუსტიციის მინისტრად ეკა ბესელიას, განათლების მინისტრის პოსტზე ნინო ლომჯარიას, გენერალური პროკურორის – ეკა გიგაურს, ეკონომიკის მინისტრად პაატა მანჯგალაძეს, სოფლის მეურნეობის მინისტრად ბექა ლილუაშვილს ან შალვა კერესელიძეს, კულტურის მინისტრად ლაშა ბუღაძეს, ჯანდაცვის მინისტრის პოსტზე სოფო ჯაფარიძეს, შერიგების მინისტრად კი გრიგოლ გეგელიას ასახელებს.
ოპოზიციის ნაწილი ჩრდილოვანი კაბინეტის სიას არ ადასტურებს.
“ჭორებზე ვერ გავაკეთებ ვერანაირ კომენტარს, ეს სია უბრალოდ ჭორია”, – აცხადებს საპარლამენტო პოლიტიკური ჯგუფის “ლელო-პარტნიორობა საქართველოსთვის” წევრი ანა ნაცვლიშვილი.
ოპოზიციის მეორე ნაწილს კი აღნიშნული გადანაწილების სია უკვირს.
“ჩემი აზრით, ეს უფრო ჰგავს ქართული ზღაპარი რომ არის, ადამიანს მაწვნის ქილა რომ აქვს გადადებული, რომ ოცნებობს, იმას გავყიდი, ქათამს ვიყიდი – ქათამს გავზრდი, გოჭს ვიყიდი და ა.შ. და ბოლოს რომ მოიქნევს, გადააგდებს, დაამტვრევს ამ ქილას. მე ეს ზღაპარი უფრო გამახსენდა, ვიდრე თქვენს მიერ ნათქვამი მკაცრი “ნაცური” ვერტიკალი.
მე მგონი მეტი შეუძლიათ. ცოტა მიკვირს, რომ ასე არასერიოზულად უყურებენ მიმდინარე პროცესს, იმის გათვალისწინებით, რომ მიშა ციხეშია და ესენი ადგილებს ინაწილებენ, რომლებსაც მიშას გარეშე ვერც ერთი ვერ დაითრევს”, – აცხადებს საპარლამენტო პოლიტიკური ჯგუფის “გირჩი” თავმჯდომარე იაგო ხვიჩია.