პოლონეთის პრეზიდენტმა არ იცის ჩვენი კანონმდებლობა და ჩვენი კანონმდებლობა ამბობს ერთ რამეს, რომ სააკაშვილს სალომე ზურაბიშვილი ვერ შეიწყალებს,- ამის შესახებ “მოქალაქეების” ლიდერმა, ალეკო ელისაშვილმა განაცხადა.
მისი თქმით, პოლონელები მხარს უჭერენ სააკაშვილს, რადგან ახსოვთ, რომ მან პოლონელ ხალხს მძიმე ვითარებაში გამოუცხადა მხარდაჭერა, თუმცა, სააკაშვილი ციხეში კონკრეტული დანაშაულების გამო ზის და მას პრეზიდენტი ვერ შეიწყალებს.
“სააკაშვილი ძალიან კონკრეტული დანაშაულისთვის ზის ციხეში. რაც შეეხება უცხოელებს, განსაკუთრებით პოლონელებს, მესმის მათი მხარდაჭერა სააკაშვილის მიმართ, რადგან იმ დროს, როდესაც მათთვის იყო ძალიან მძიმე დღეები, როდესაც მთელი ელიტა, კატინის ერთ-ერთ წლისთავზე რომ მიდიოდნენ კატინში, ვიცით, რაც მოხდა, რაც ჩაიდინეს რუსებმა და შემდეგ თვითმფრინავი ძალიან უცნაურად რომ ჩამოვარდა, მათ შორის, პრეზიდენტი კაჩინსკი რომ დაიღუპა, მაშინ, თუ გახსოვთ, ძალიან გართულებული იყო ფრენები, ისლანდიაში ვულკანი იყო ამოფრქვეული, ვერავინ ჩაფრინდა და სააკაშვილი, რაც მართალია, მართალია, ძალიან ვაჟკაცურად მოიქცა, რაც ძალიან იშვიათია მის ბიოგრაფიაში, მაგრამ ვაჟკაცურად მოიქცა. ამას დაფასება უნდა და ის იყო ერთ-ერთი, მგონი ერთადერთი პოლიტიკური ლიდერი, რომელიც ჩავიდა კაჩინსკის გასვენებაში. ეს ახსოვთ პოლონელებს, რადგან მადლიერი ხალხია და იმიტომ უჭერენ ისინი მხარს. აქ გასაკვირს და ჩვენს შეურაცხმყოფელს ვერაფერს ვხედავ. პირიქით, ის ხალხი მადლიერების გამო აკეთებს ამას. მაგრამ, რა თქმა, უნდა პოლონეთის პრეზიდენტმა არ იცის ჩვენი კანონმდებლობა და ჩვენი კანონმდებლობა ამბობს ერთ რამეს, რომ სააკაშვილს სალომე ზურაბიშვილი ვერ შეიწყალებს. ეს არის სამართლებრივად აბსურდი, გამორიცხული. ვერ შეიწყალებს. შეიწყალებს, მაგრამ, როგორც კი კარი გაიღება საპატიმროში, იმ წამს შეაბრუნებენ სააკაშვილს უკან, რადგან შეწყალება ხდება დამდგარ განაჩენზე, როდესაც უკვე განაჩენი არის დამდგარი, გამოცხადებულია, რამდენი წელი უნდა მიესაჯოს კონკრეტული მუხლისთვის კონკრეტულ მსჯავრდებულს, მაშინ აქვს პრეზიდენტს შეწყალების უფლება“, – განაცხადა ალეკო ელისაშვილმა.
ცნობისთვის, პოლონეთის საგარეო საქმეთა მინისტრმა, რადოსლავ სიკორსკიმ განაცხადა, რომ საქართველოს პრეზიდენტმა შესაძლოა, წვლილი შეიტანოს სააკაშვილის გათავისუფლებაში.