გაეროში ისრაელის ელჩმა, გილად ერდანმა განაცხადა, რომ „ჰამასის“ არდაგმობა გაეროს ტრადიციაა.
“ბოლო 137 დღის განმავლობაში, ერთადერთი გამოსავალი, რომელიც განიხილება საერთაშორისო ასპარეზზე, არის ცეცხლის შეწყვეტის [ეს] აბსურდული ცნება. დააბრუნებს თუ არა ცეცხლის შეწყვეტა მძევლებს სახლში? გაანადგურებს თუ არა ცეცხლის შეწყვეტა “ჰამასს”? განაიარაღებს თუ არა ცეცხლის შეწყვეტის შეთანხმება “ჰეზბოლას”, ჰუტისებს და ყველა სხვა ირანის მიერ მხარდაჭერილ ტერორისტულ ძალას ჩვენს რეგიონში?” – აღნიშნა გილად ერდანმა.
გაეროში ისრაელის ელჩმა ხაზგასმით აღნიშნა, რომ ცეცხლის შეწყვეტის შემთხვევაში, “ჰამასი” გადაჯგუფდება, ხელახლა შეიარაღდება და გენოციდის შემდეგი მცდელობა მხოლოდ დროის საკითხი იქნება.
“ჰამასის სისასტიკეების არდაგმობა ახლა აქ [გაეროში] ტრადიციად იქცა. ეს ტრაგიკული მოვლენაა”, – დასძინა მან.