ისრაელის მხრიდან ირანზე შესაძლო საპასუხო რეაქცია ატომური ენერგიის საერთაშორისო სააგენტოს აშფოთებს. ორგანიზაციის დირექტორი რაფაელ გროსი შიშობს, რომ ისრაელის შესაძლო თავდასხმის სამიზნე, შეიძლება ირანის ბირთვული ობიექტები გახდეს.
გაეროს შტაბ-ბინაში მან ჟურნალისტებთან აღნიშნა, რომ ირანმა ბირთვული ობიექტები სააგენტოს ინსპექტორებისთვის კვირას დახურა, თუმცა პირობა მიიღო, რომ მონიტორინგის განახლება დღეიდან იქნება შესაძლებელი.
„რა თქმა უნდა ჩვენ ვშიშობთ, რომ ისრაელის შესაძლო საპასუხო იერიშის სამიზნე, შეიძლება ირანის ბირთვული ობიექტები გახდეს. თეირანმა კვირას გვაცნობა, რომ ბირთვული ობიექტები, რომელსაც ჩვენი ინსპექტორები ყოველდღიურად ამოწმებენ, უსაფრთხოების მიზნით დაიხურა. ირანი მათ გახსნას დღეს აპირებს, თუმცა ინსპექტორების უსაფრთხოებისთვის, მონიტორინგის განახლებას ხვალიდან ვაპირებთ. ამასთან, ყველას მოვუწოდებთ თავშეკავებისკენ“, – აღნიშნა ატომური ენერგიის საერთაშორისო სააგენტოს დირექტორმა რაფაელ გროსმა.