საფრანგეთის საპრეზიდენტო არჩევნებში „ნაციონალური ფრონტის“ ლიდერის მარინ ლე პენის გამარჯვება ევროპის დასასრული იქნება. ამის შესახებ ევროკომისარმა პიერ მოსკოვიციმ განაცხადა.
მოსკოვიცის თქმით, თუკი ლე პენის წინასაარჩევნო დაპირების თანახმად, საფრანგეთი ევროკავშირიდან და ევროზონიდან გავა, თანამედროვე ევროპა არსებობას შეწყვეტს.
ევროკომისარი ამბობს, რომ ევროკავშირი მოვლენათა განვითარების ასეთ სცენარს არც კი განიხილავს.
„ჩვენი გეგმის მიხედვით, ლე პენი წააგებს არჩევნებს. მე ამის იმედი მაქვს. დიდი ხანია პოლიტიკაში ვარ და ჩემი გამოცდილება მაძლევს უფლებას ვივარაუდო, რომ ალტერნატიული გეგმისთვის მზადება, რაც მარინ ლე პენის გამარჯვების შემთხვევაში დაგვჭირდება, არ მოგვიწევს“, -დასძინა მოსკოვიციმ.
საფრანგეთში საპრეზიდენტო არჩევნები 2017 წლის აპრილ-მაისში გაიმართება. ლე პენის გარდა, არჩევნებში მემარჯვენე პარტიის, “რესპუბლიკელების” კანდიდატი ფრანსუა ფიონი და მოძრაობის “წინ!” ლიდერი ემანუელ მაკრონი მონაწილეობენ.