ღაზის სექტორის ქალაქ რაფაჰში სრულმასშტაბიან შეჭრასთან დაკავშირებით ისრაელის გეგმას მხარს არ უჭერს დიდი ბრიტანეთი. გაერთიანებული სამეფოს საგარეო საქმეთა მინისტრი არ ეთანხმება ისრაელისთვის იარაღის მიყიდვის შეწყვეტის იდეასაც.
„ისრაელისთვის იარაღის ექსპორტზე მიდგომის შეცვლა გააძლიერებს „ჰამასს“ და მძევლების გათავისუფლებასთან დაკავშირებულ გარიგებას ნაკლებად სავარაუდოს გახდის. არ ვფიქრობ, რომ ეს სწორი მიდგომა იქნება. რაც შეეხება რაფაჰს, დიდი შეტევის განხორციელებისთვის აუცილებელია არსებობდეს აბსოლუტურად მკაფიო გეგმა იმასთან დაკავშირებით თუ როგორ დაიცვან ადამიანების სიცოცხლე და როგორ უზრუნველყონ ისინი საკვებით, მედიკამენტებით და თავშესაფრით. ჩვენ არ გვინახავს ასეთი გეგმა, ამიტომ ამ შეტევას მხარს არ ვუჭერთ. ჩვენ ასევე ვეწინააღმდეგებით ისრაელისთვის იარაღის მიყიდვის შეწყვეტის იდეას“, – განაცხადა კემერონმა.