კვირას, 9 ივნისს, ლიეტუვამ ევროპარლამენტში 11 წარმომადგენელი აირჩია. ზოგიერთი მათგანი ბრიუსელში ადრეც საქმიანობდა, ექვსი კი პირველად გახდა ევროდეპუტატი.
ისევე როგორც 2019 წელს, პარტიამ „სამშობლოს კავშირი – ლიეტუვას ქრისტიან-დემოკრატები“ (TS-CDL) ევროპარლამენტში ახლაც სამი ადგილი მიიღო. ამომრჩეველთა გადაწყვეტილებით, ორი კონსერვატიული დეპუტატი – ანდრიუს კუბილიუსი და რასა იუკნიავიჩენე – ბრიუსელში მეორე ვადით დაბრუნდებიან, ლიუდას მაჟილისი კი, რომელიც TS-LKD-ის სიას ხუთი წლის წინ ხელმძღვანელობდა, ევროპარლამენტს დატოვებს და მის პარტიულ კვოტას სეიმის ამჟამინდელი სპიკერის მოადგილე, პაულიუს საუდარგასი შეავსებს.
ლიეტუვას სოციალ-დემოკრატიულმა პარტიამაც (SDPL) ხუთი წლის წინ მიღწეული შედეგი გაიმეორა და ევროპის პარლამენტში ორი ადგილი მიიღო. SDPL-ის ლიდერი, ვილია ბლინკევიჩიუტე ბრიუსელში „მეორე წრეზე“ მიდის, იუოზას ოლეკასს კი პარტიის საპატიო თავმჯდომარე, ვიტიანის პოვილას ანდრიუკაიტისი ჩაანაცვლებს.
2019 წელს ლიეტუვას „ფერმერთა და მწვანეთა კავშირმა“ ევროპარლამენტში ორი მანდატი მიიღო, რომლებიც ბრონის როპეს და ყოფილ კალათბურთელს, შარუნას მარჩიულონისს ერგოთ, თუმცა ამ უკანასკნელმა თავისი ადგილი სტასის იაკელიუნასს დაუთმო. მეორე ვადით ბრიუსელში არცერთი მათგანი არ დაბრუნდება – „ფერმერთა და მწვანეთა კავშირს“ ამჯერად მხოლოდ ჯანდაცვის ყოფილი მინისტრი, დეპუტატი აურელიუს ვერიგა წარადგენს.
ლიეტუვაში მცხოვრები პოლონელების და „ქრისტიანული ოჯახების“ ალიანსის შედეგები არ შეცვლილა. ამ პარტიამ ევროპარლამენტში კვლავ ერთი ადგილი მოიპოვა და ბრიუსელში მეორე ვადით მისი ლიდერი, ვალდემარ ტომაშევსკი გაემგზავრება.
„ლიბერალურ მოძრაობას“ ევროპარლამენტში პეტრას აუშტრევიჩიუსიც ასევე კიდევ ხუთი წლის განმავლობაში წარმოადგენს. მიუხედავად იმისა, რომ წელს ის პარტიულ სიაში მეორე იყო, მან საკმარისი ხმები მიიღო იმისთვის, რომ სიის ლიდერისთვის – ევგენიუს გენტვილასისთვის გადაესწრო.
„თავისუფლების პარტიამ“, რომელმაც პირველად მიიღო ევროპარლამენტის არჩევნებში მონაწილეობა, ერთი ადგილი მოიპოვა და ბრიუსელში საკონსტიტუციო სასამართლოს ყოფილ თავმჯდომარეს და პარტიის საპრეზიდენტო კანდიდატს, დაინიუს ჟალიმასს აგზავნის.
„დემოკრატიული კავშირი – ლიეტუვასთვის“ ასევე პირველად მონაწილეობდა ამ არჩევნებში და მანაც ერთი მანდატი მოიპოვა, რომელიც ევროკავშირის გარემოს დაცვის, ოკეანეებისა და მეთევზეობის ამჟამინდელ კომისარს, ვირგინიუს სინკევიჩიუსს გადაეცემა.
ევროპარლამენტში კიდევ ერთი „ახალწვეულია“ პეტრას გრაჟულისი, – ყოფილი დეპუტატი, რომელსაც, ფიცის დარღვევის გამო, იმპიჩმენტი მოუწყვეს და სეიმიდან გარიცხეს. ლიეტუვას კონსტიტუციის თანახმად, პოლიტიკოსი, რომელიც იმპიჩმენტს დაექვემდებარა, ქვეყნის პარლამენტში ან საპრეზიდენტო არჩევნებში 10 წლის განმავლობაში ვერ იყრის კენჭს, მაგრამ ევროპარლამენტზე ეს წესი არ ვრცელდება.
2019 წელს ლეიბორისტულმა პარტიამ ევროპარლამენტში ერთი ადგილი მიიღო და ბრიუსელში თავისი თავმჯდომარე, ვიქტორ უსპასკიჩი გაგზავნა. თუმცა, ლიეტუველი ლეიბორისტებისთვის წელს ჩატარებული არჩევნები წარუმატებელი აღმოჩნდა – მათ ხმების მხოლოდ 1,63% მიიღეს და ევროპარლამენტის მანდატი დაკარგეს.
ეს იყო მეორე შემთხვევა, როდესაც ევროპარლამენტის არჩევნები ლიეტუვაში საპრეზიდენტო არჩევნებთან ერთად არ ჩატარდა, რამაც ამომრჩეველთა დაბალი აქტივობა განაპირობა. 10 ივნისის არჩევნებში ხმის უფლების მქონე მოქალაქეთა მხოლოდ 28,34%-მა მიიღო მონაწილეობა.