დასრულდა სასამართლო პროცესები, წალენჯიხის მუნიციპალიტეტის მერიის მიერ საბავშვო ბაგა-ბაღების თანამშრომელთა მასობრივ გათავისუფლებებთან დაკავშირებით.
ქუთაისის სააპელაციო სასამართლომ ძალაში დატოვა პირველი ინსტანციის-ზუგდიდის საქალაქო სასამართლოს გადაწყვეტილება და გათავისუფლებები ცნო უკანონოდ.
სასამართლოს გადაწყვეტილებით დაკმაყოფილდა სპმთპ-ის იურიდიული დეპარტამენტის უფროსის გიორგი ქოსაშვილის სამივე სასარჩელო მოთხოვნა, რომლის მიხედვით წალენჯიხის მერიას დაეკისრა : 1. 19 გათავისუფლებული დასაქმებულის გათავისუფლებების ბრძანებების ბათილად ცნობა; 2. გათავისუფლებული დასაქმებულების პირვანდელ სამუშაოზე აღდგენა; 3. გათავისუფლებული დასაქმებულთათვის 18 თვის განაცდურის ანაზღაურება.
ბუნებრივია კითხვები: ,,რა მიზნით მიიღო ასეთი უკანონო გადაწყვეტილებები წალენჯიხის მერიამ?“ ,,რატომ არ გაითვალისწინა წალენჯიხის მერიამ პედაგოგთა და მეცნიერთა თავისუფალი პროფკავშირის არგუმენტირებული მოსაზრებები და წინადადებები უკანონო გადაწყვეტილების მიღებამდე?“ ,,ვინ აგებს პასუხს გათავისუფლებული თანამშრომლებისათვის ასეთი მორალური ზიანის მიყენების გამო ან იმ ფინანსურ ზარალზე, რაც მიიღო წალენჯიხის მერიის ბიუჯეტმა უკანონო გათავისუფლებების შედეგად?“ სამწუხაროდ, დამკვიდრებული პრაქტიკის თანახმად, სასამართლოს გადაწყვეტილების შემდეგ არ დამდგარა დღის წესრიგში იმ დამსაქმებლების პასუხისმგებლობის საკითხი, რომელთაც კანონის უხეში დარღვევით შელახეს თანამშრომელთა უფლებები და თავიანთი უკანონო ქმედებებით ზარალი მიაყენეს ბიუჯეტს.
გაცნობებთ, რომ სასამართლოს გადაწყვეტილებით, წალენჯიხის მერია ვალდებულია საბავშვო ბაგა-ბაღებიდან გათავისუფლებული 19 თანამშრომელი აღადგინოს სამსახურში და მათ ბიუჯეტიდან გადაუხადოს, ჯამში, 133 ათას ლარამდე განაცდური.
ინფორმაციას სპმთპ-ის წალენჯიხის რაიონული ორგანიზაცია ავრცელებს.