„ქართული ოცნების“ დეპუტატები ფეხბურთელთა ეროვნული ნაკრების წევრებს ისტორიულ მატჩზე წარმატებას უსურვებენ და იმედოვნებენ, რომ ევროპის ჩემპიონატზე სადებიუტო თამაში ქართული ფეხბურთის ისტორიაში მორიგ წარმატებულ ნაბიჯად შევა.
„დარწმუნებული ვარ, რომ დღევანდელი დღე კიდევ უფრო დიდი გამარჯვების აღნიშვნის საფუძველი გახდება და ჩვენი ბიჭები მათთვის ჩვეული შემართებით, გუნდურობით საქართველოს სახელს გაიტანენ ევროპულ ასპარეზზე ისე, როგორც მათ ეს სჩვევიათ და ჩვენ ევროპის ჩემპიონატზე პირველი ისტორიული გამარჯვების მომსწრენი გავხდებით“, – აღნიშნა განათლების, მეცნიერებისა და ახალგაზრდობის საკითხთა კომიტეტის თავმჯდომარემ გივი მიქანაძემ.
„გვჯერა ჩვენი ბიჭების და ჩვენი ეროვნული ნაკრების. დარწმუნებული ვარ, დღეს თითოეული ქართველი იზეიმებს იმ გამარჯვებას, რომელსაც ჩვენი ეროვნული ნაკრები სადებიუტო მატჩში დამსახურებულად მოიპოვებს“, – აცხადებს ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე რატი იონათამიშვილი.
„გამორჩეული დღეა სრულიად საქართველოსთვის. ჩვენ ძალიან დიდი ხანი ველოდებოდით ამ თარიღს. ღრმად ვარ დარწმუნებული, რომ 11 მოთამაშესთან ერთად იქ იქნება სრულიად საქართველო. ვუსურვებ ბიჭებს წარმატებას, გამარჯვებას“, – განაცხადა იურიდიულ საკითხთა კომიტეტის თავმჯდომარის პირველმა მოადგილემ დავით მათიკაშვილმა.
საქართველოს ეროვნული ნაკრები ევროპის ჩემპიონატზე სადებიუტო შეხვედრას დღეს გამართავს. ქალაქ დორტმუნდში „სიგნალ იდუნა პარკზე“ ქართველების მეტოქე თურქეთის გუნდი იქნება. შეხვედრა თბილისის დროით 20:00 საათზე დაიწყება.