მაშინ, როდესაც სხვა ქვეყნები ევროკომისიის თანამდებობებზე კანდიდატების დასახელებას იწყებენ, ლიეტუვას ლიდერებს შესაბამისი კანდიდატურები ჯერ არ დაუმტკიცებიათ.
ლიეტუვას საგარეო საქმეთა მინისტრმა, გაბრიელიუს ლანდსბერგისმა ცოტა ხნის წინ განაცხადა, რომ ქვეყანამ არ უნდა დააყოვნოს ევროკომისრის პოსტზე განაცხადის შეტანა, რადგან „დრო გადის და გადაწყვეტილებების მიღება არ უნდა დაყოვნდეს“.
თუმცა, პრეზიდენტი მას არ ეთანხმება. „ლიეტუვა არაფერს კარგავს. ასეთი საუბრები, ალბათ, ჩემი კონსერვატორი მეგობრების წრეში მიმდინარეობს“, – განაცხადა მან სამშაბათს, 18 ივნისს ბრიუსელში.
ეს ყველაფერი კონსერვატიული ძალებისგან დაკომპლექტებულ მთავრობასა და პრეზიდენტს შორის გაჭიანურებული დავების ფონზე ხდება. მანამდე ისინი საჯაროდ კამათობდნენ იმაზე, თუ ვინ უნდა წარმოადგენდეს ქვეყანას ბრიუსელში უმაღლესი დონის შეხვედრების დროს.
ქვეყნის სათავეში ამჟამინდელი ხელისუფლების ყოფნის უმეტეს პერიოდში საშინაო პოლიტიკასთან დაკავშირებული სხვა უთანხმოებებიც თვალშისაცემი იყო.
სამშაბათს ნაუსედამ ასევე განაცხადა, რომ ის გვერდს ვერ აუვლის მოლაპარაკებებს იმის შესახებ, თუ ვისი დელეგირება უნდა მოახდინოს ლიეტუვამ ევროკომისიაში.
პრეზიდენტის თქმით, მას ჯერ არ გადაუწყვეტია, რომელ კანდიდატს დაუჭერს მხარს, მაგრამ ყველა გააფრთხილა, რომ „წინასწარ გარანტირებულად“ არავინ უნდა იგრძნოს თავი.
„როდესაც პორტფელებზე საუბრის დრო დადგება, ჩვენ ვისაუბრებთ პორტფელებზე, მაგრამ ლიეტუვაში წინასწარ არავინ უნდა გრძნობდეს გარანტირებულად თავს, რომ აუცილებლად ის იქნება წარდგენილი და პრეზიდენტი მის კანდიდატურას დაამტკიცებს, – განუცხადა ნაუსედამ ბრიუსელში ჟურნალისტებს, – გადაწყვეტილება ჯერ არ მიმიღია და თუ ვინმე ფიქრობს, რომ ამას ჩემი გვერდის ავლით გააკეთებს, ძალიან ცდება“.
პრეზიდენტის თქმით, ევროკომისიაში ლიეტუვას წარმომადგენლის საკითხის დასმა ნაადრევია, რადგან ჯერ არ არის მიღწეული შეთანხმება, ვინ გახდება ევროკომისიის მომავალი პრეზიდენტი.
„როგორც ადამიანმა, რომელმაც ბრიუსელის დერეფნებში სიარულისას საკმარისად ბევრი რამ ნახა, შემიძლია ვთქვა, რომ არსებობს პოლიტიკური დღის წესრიგი, რომლის მიხედვითაც, ევროკომისრის კანდიდატურა პრეზიდენტთან უნდა იყოს შეთანხმებული. პრეზიდენტთან და არა პრემიერ-მინისტრთან“, – განაცხადა ნაუსედამ.
მედიის ცნობით, ევროკომისრის პოსტზე წარსადგენად საგარეო საქმეთა მინისტრის, კონსერვატიული კოალიცია „სამშობლოს კავშირი – ლიეტუვას ქრისტიან-დემოკრატების“ ლიდერის, გაბრიელიუს ლანდსბერგისის კანდიდატურა განიხილება.
„ევროკავშირის უმსხვილესი პარტიები ჯერ კიდევ განიხილავენ ოთხი საკვანძო პოზიციის გამიჯვნის საკითხს, რათა ის შესაბამისობაში იყოს ევროპარლამენტის 6-9 ივნისის არჩევნების შედეგებთან“, – ამბობს ნაუსედა.
ევროკავშირის ზოგიერთ ყველაზე მნიშვნელოვან ოფიციალურ პირს ევროპული საბჭო ნიშნავს, ზოგს კი – ევროპარლამენტი.