თურქეთს ყოველთვის ჰყავდა კარგი ნაკრები, მაგრამ ჩვენი ნაკრები უკვე ძლიერ ნაკრებად ჩამოყალიბდა და თამამად შეგვიძლია, ყველა ნაკრებს წინააღმდეგობაც გავუწიოთ და გამარჯვებაზეც ვიფიქროთ, – განაცხადა „დღის ქრონიკაში“ ეროვნული ნაკრების ყოფილმა წევრმა, ვეტერანმა ფეხბურთელმა დავით სირაძემ, რომელმაც 2007 წელს თურქეთის ნაკრების კარში გოლი გაიტანა.
მან გულშემატკივრებს დღევანდელი დღე მიულოცა.
„დიდი იმედი გვაქვს, რომ ჩვენი ბიჭები წარმატებით დაასრულებენ დღევანდელ თამაშს. ვიცი, რომ ძალიან დიდი მონდომება აქვთ და ქართველი ხალხისგან დიდ მხარდაჭერას გრძნობენ.
თურქეთს ყოველთვის ჰყავდა კარგი ნაკრები. ახლაც ჰყავთ გამორჩეული ფეხბურთელები, მაგრამ ბოლო თამაშებში ძალიან კარგად ჩანს, რომ ჩვენი ნაკრები უკვე ძლიერ ნაკრებად ჩამოყალიბდა. საქართველოს ნაკრებს აღარ უყურებენ ისე, რომ მათ ადვილად მოუგებენ. ყველა პოზიციაზე ჩვენ გვყავს ძლიერი ფეხბურთელები და თამამად შეგვიძლია, ყველა ნაკრებს წინააღმდეგობაც გავუწიოთ და გამარჯვებაზეც ვიფიქროთ. ჩვენი ბიჭები სისტემატურად რომ თამაშობენ კარგ ქვეყნებში და კარგ ჩემპიონატში, უკვე აისახა ჩვენს ნაკრებზე და ჩვენი ნაკრების შედეგზე. გუნდური, ერთიანები არიან და მთელი საქართველოც უნდა გაერთიანდეს, ამ ბიჭებს ყველა გვერდით უნდა დავუდგეთ. მე თავად ფეხბურთელი ვიყავი და ვიცი, რას ნიშნავს, როცა ქართველი ხალხის და გულშემატკივრის მხარდაჭერას გრძნობ”, – განაცხადა ვეტერანმა ფეხბურთელმა.
მისი შეფასებით, დღეს ტურნირის პირველ თამაშზე მთავარი მიზანი თურქეთთან გამარჯვების მოპოვებაა.
„როცა ჩვენ გვყავს ხვიჩა კვარაცხელია და კარში მამარდაშვილი, რა თქმა უნდა, თურქეთის ნაკრებისთვისაც ეს წნეხია. უნდა დავანახოთ ევროპასაც და მსოფლიოსაც, რომ ჩვენ ვართ საქართველო”, – განაცხადა დავით სირაძემ.