ჟურნალისტი ნატო ონიანი ზაზა დარასელის შესახებ სოციალურ ქსელში პოსტს აქვეყნება.
”ზაზას დღეა დღეს, ადამიანის, რომელმაც ჩემს ცხოვრებაში ძალიან ბევრი რამ შეცვალა. ერთ მშვენიერ დღეს, მე, რადიოჟურნალისტი, რომელსაც ტელევიზიაში ერთი სიუჟეტიც არ მქონდა მომზადებული და მხოლოდ ვიდეო კასეტას (ისიც არაპროფესიულს) ვცნობდი, ჩემთვის უცნობ ზაზა დარასელს კაბინეტში ვეწვიე და მოვახსენე – საკვირაო ანალიტიკური პროგრამა მინდა გავაკეთო-თქო. ახლა რომ ვფიქრობ, ყველა ლოგიკით, ზაზას ბევრი უნდა ეცინა და დამმშვიდობებოდა. ზაზა კი იმწამსვე დამთანხმდა და რეჟისორს – ჩემს უსაყვარლეს დათო ასათიანს ჩამაბარა. გადაცემა 3 კვირაში ეთერში იყო, 5 თვეში კი რეიტინგში პირველი. ასეთი იყო ზაზა, ადამიანი, რომელიც გაძლევდა შანსს, გიხსნიდა ახალი შესაძლებლობების სივრცეს. მას მერე ბევრი წელი გავიდა, მე კი ნებისმიერ დამწყებთან ურთიერთობისას ზაზას გაკვეთილს ვიყენებ – ვაძლევ შანსს. ამაზე მნიშვნელოვანი პროფესიაში მერწმუნეთ, არაფერია. კიდევ ის მახსოვს გამორჩეულად, სოხუმი რომ დაეცა და ზაზამ მეორე არხის ეთერი გათიშა. იქამდე, 1 კვირით ადრე რომ აცხადებდნენ რუსები სოხუმი ჩაბარდაო, დერეფანში რომ გამოვარდებოდა და მთელი შენობის გასაგებად იძახდა – ტყუილია, ახლა ველაპარაკე ბიჭებს, ქალაქი ჩვენიაო. კიდევ უფრო ადრე – სოხუმში რომ წავიდა შუა ომში და იქიდან საოცარ რეპორტაჟებს აგზავნიდა… მეორე არხი იყო ჩემი საუკეთესო წლები და საუკეთესო გამოცდილება. ამდენი წელი გავიდა და ის, რაც ზაზამ გააკეთა, ვერავინ გაიმეორა – შექმნა არხი, სადაც კი არ ვმუშაობდით, ვცხოვრობდით, გვიხაროდა, ბედნიერები ვიყავით, ვქმნიდით რაღაც ახალს და გვჯეროდა, რომ – ეს მეორე არხია! ძალიან მიყვარხარ ზაზა, გილოცავ იქ, სადაც ხარ!”
ცნობილ ქართველ ჟურნალისტს ზაზა დარასელს დღეს 74 წელი შეუსრულდებოდა.
