გამბიის სალიზინგო კომპანია „მაკა ინვესტის“ კუთვნილი ორი „ეარბას ეი340“, რომლებიც თებერვლის ბოლოს ლიეტუვური შიაულიაიდან შრი-ლანკასა და ფილიპინებში უნდა გაფრენილიყვნენ, ირანში დაეშვნენ. ამ ინფორმაციას ბიზნესის სიახლეების ვებ-გვერდი vz.lt ავრცელებს.
თვითმფრინავების ტრანსპონდერები ირანში შესვლისთანავე გაითიშა. ცოტა ხნის შემდეგ, საავიაციო მონაცემთა პლატფორმა ch-aviation-მ გაავრცელა ინფორმაცია, რომ ერთი თვითმფრინავი თეირანის მეჰრაბადის აეროპორტში დაეშვა, მეორე კი – ქვეყნის სამხრეთით, ჩაბაჰარში არსებულ კონარაკის აეროპორტში.
vz.lt-ის ცნობით, ირანში მოქმედმა საავიაციო კომპანია Mahan Air-მა ამ გზით მოახერხა თავისი ორი თვითმფრინავის დაბრუნება, რომლებიც ირანის ბირთვული პროგრამის გამო აშშ-ის მიერ დაწესებულ სანქციებს ექვემდებარებოდნენ.
„მაკა ინვესტის“ კუთვნილი მესამე თვითმფრინავი შიაულიაიში რჩება. შიაულიაის აეროპორტის დირექტორის, აურელია კუეზადას თქმით, მას აფრენის უფლება იმის გამო არ მისცეს, რომ სათადარიგო ნაწილები გადაჰქონდა.
„ეს თვითმფრინავი ფილიპინებში უნდა გაფრენილიყო, მაგრამ ჩვენ ვივარაუდეთ, რომ ისიც შესაძლოა ირანში დაშვებულიყო. ამას ხელს ვერაფერი შეუშლიდა. ასე რომ, ჩვენ უყურადღებოდ არ დავტოვეთ, როდესაც გავიგეთ, რომ ადრე თვითმფრინავები ირანში დაეშვნენ“, – აღნიშნა კუეზადამ.
ლიეტუვას სახელმწიფო სანავიგაციო სერვისის პროვაიდერმა, Oro Navigacija-მ ვებ-გვერდ vz.lt-ს განუცხადა, რომ სამი თვითმფრინავი არანაირ ეჭვს არ იწვევდა და ლიეტუვას საჰაერო სივრცის გარეთ მათი გადაადგილება სხვა ქვეყნების საჰაერო ნავიგაციის სერვისების პროვაიდერების პასუხისმგებლობაა.