ბაიდენის ადმინისტრაცია ნატოს მოკავშირეებს აფრთხილებს, რომ რუსეთი აძლიერებს საბოტაჟისა და ჰიბრიდული ომის ფარულ კამპანიას უკრაინის მომხრეების წინააღმდეგ, – წერს ამერიკული გაზეთი The Washington Post-ი.
სტატიაში აღნიშნულია, რომ მზარდი რუსული საფრთხის წინააღმდეგ საბრძოლველად, აშშ-ის სადაზვერვო სააგენტოები უზიარებენ ინფორმაციას ევროპელ პარტნიორებს, რომელიც მათ შეუძლიათ გამოიყენონ დივერსანტების საქმიანობის ჩაშლის მიზნით.
„მიმდინარე თვეში, აშშ-ის ეროვნული დაზვერვის სამსახურის დირექტორმა, ევრილ ჰეინსმა ნატოს საბჭოს წევრებს აცნობა ფარული, რუსეთთან დაკავშირებული თავდასხმების გახშირების შესახებ, რომელიც ამ გაზაფხულზე დაიწყო“, – აღნიშნულია სტატიაში.
როგორც The Washington Post-ი აღნიშნავს, საბოტაჟის სამიზნეები ძირითადად დაკავშირებულია ევროპაში უკრაინის ლოგისტიკურ მხარდაჭერასთან.
„რუსეთის პრეზიდენტისთვის ეს დამახასიათებელი მიდგომაა: აგრესიული, მაგრამ ფარული თავდასხმა, რათა მაქსიმალურად გაზარდოს არეულობა და ზიანი მისი მოწინააღმდეგეებისთვის და მინიმუმამდე დაიყვანოს საფრთხე საკუთარი თავისთვის“, – წერს გაზეთ The Washington Post-ი კოლუმნისტი, დევიდ იგნატიუსი.
დევიდ იგნატიუსის თქმით, აშშ-ის ოფიციალურმა პირებმა მას განუცხადეს, რომ ბოლო თავდასხმებში მონაწილეობის დასაფარად, რუსულმა დაზვერვამ დაიქირავა ადგილობრივი ბანდიტები თავისი ოპერაციების განსახორციელებლად.
მარტში, ბრიტანეთში რამდენიმე ეჭვმიტანილი დააკავეს აღმოსავლეთ ლონდონში უკრაინის საკუთრებაში მდებარე საწყობში გაჩენილი ხანძრის შემდეგ. ხანძარი გაჩნდა ესპანეთში ამავე კომპანიის საკუთრებაში არსებულ საწყობში, რომელშიც ასევე იყო უკრაინისათვის განკუთვნილი საკომუნიკაციო ტექნიკა. გასულ თვეში პოლონეთში დააკავეს 12 ეჭვმიტანილი დივერსანტი, რომლებიც, სავარაუდოდ, გეგმავდნენ თავდასხმებს უკრაინის მიწოდების ხაზებზე.
ბაიდენის ადმინისტრაციის სტრატეგია პუტინთან დასაპირისპირებლად ფოკუსირებულია სადაზვერვო ინფორმაციის გაზიარებაზე.
„რუსეთი იმედოვნებს, რომ დათესავს შიშს და შექმნის ბზარს“, – განაცხადა აშშ-ის ადმინისტრაციის მაღალჩინოსანმა.