სპეციალური საგამოძიებო სამსახურის თანამშრომლებმა, ფრანკფურტში „კორუფციის წინააღმდეგ ბრძოლის ევროპელ პარტნიორთა ქსელის“ (EPAC) მიერ ორგანიზებულ საერთაშორისო კონფერენციასა და მადრიდში „სისხლის სამართლის საქმეთა გამოძიების საერთაშორისო ქსელის“ (ICIN) შეხვედრაში მიიღეს მონაწილეობა, – ამის შესახებ ინფორმაციას სპეციალური საგამოძიებო სამსახური ავრცელებს.
უწყების ცნობით, ქალაქ ფრანკფურტში გამართულ საერთაშორისო კონფერენციაში ჩრდილოეთ ირლანდიის პოლიციის ომბუდსმენი, ფედერალური პოლიციის კომისარი, გერმანიის უნივერსიტეტების აკადემიური წრის წარმომადგენლები და ექსპერტები მონაწილეობდნენ.
„მონაწილე მხარეებმა, პოლიციის ანგარიშვალდებულება, პოლიციის წინააღმდეგ საჩივრების განმხილველი დამოუკიდებელი ორგანოების პრაქტიკა და გამოწვევები ხუთი ქვეყნის – კანადის, საფრანგეთის, გერმანიის, იაპონიისა და დიდი ბრიტანეთის მაგალითზე განიხილეს. ასევე, საუბარი შეეხო სამწლიანი საერთაშორისო კვლევითი პროექტის შედეგებს, რომელშიც მონაწილეობა დარგის ექსპერტებმა და პრაქტიკოსებმა მიიღეს.
სპეციალური საგამოძიებო სამსახურის თანამშრომლებმა ასევე, ქალაქ მადრიდში, სისხლის სამართლის საქმეთა გამოძიების საერთაშორისო ქსელის (Internal Criminal Investigations Network) სამუშაო შეხვედრაში მიიღეს მონაწილეობა. სისხლის სამართლის საქმეთა გამოძიების საერთაშორისო ქსელში (ICIN) საქართველოსთან ერთად, 25 ქვეყანაა გაერთიანებული. ქსელის (ICIN) საქმიანობის მიზანია საგამოძიებო პროცესთან დაკავშირებული საუკეთესო საერთაშორისო პრაქტიკის გაზიარება და ქვეყნებს შორის თანამშრომლობის გაძლიერება.
შეხვედრას ქართული მხარის გარდა, შვედეთის სპეციალური საგამოძიებო სამსახურის, ნიდერლანდების დამოუკიდებელი საგამოძიებო ორგანოს, დიდი ბრიტანეთის მეტროპოლიტენის პოლიციის, საფრანგეთის ეროვნული ჟანდარმერიის გენერალური ინსპექციის, ესპანეთის ნაციონალური პოლიციის, ესტონეთის შინაგან საქმეთა ბიუროს, უნგრეთის ეროვნული უსაფრთხოების სამსახურის, ასევე, მალტას, გერმანიის, სლოვენიისა და დანიის სამართალდამცავი ორგანოების წარმომადგენლები ესწრებოდნენ.
სამუშაო შეხვედრაზე, მონაწილე ქვეყნის წარმომადგენლებმა კოლეგებს საგამოძიებო მოქმედებების დაგეგმვისა და წარმართვის, საგამოძიებო სტრატეგიის, ოპერატიული ინფორმაციის გაზიარების და მხილების ინსტიტუტის ეფექტური ფუნქციონირების თაობაზე საკუთარი გამოცდილება გაუზიარეს. სპეციალური საგამოძიებო სამსახური „კორუფციის წინააღმდეგ ბრძოლის ევროპელ პარტნიორთა ქსელის“ (The European Partners against Corruption/EPAC) და „სისხლის სამართლის საქმეთა გამოძიების საერთაშორისო ქსელის“ (ICIN) წევრი 2023 წელს გახდა. სპეციალური საგამოძიებო სამსახურის გამომძიებლები საუკეთესო საერთაშორისო გამოცდილების გაზიარების მიზნით მსგავს ღონისძიებებში მონაწილეობას მომავალშიც აქტიურად გააგრძელებენ“, – ნათქვამია უწყების განცხადებაში.