ფეხბურთმა ისევ გააერთიანა მთელი ქვეყანა და გვაჩუქა სიამაყის განცდა, რომ ამ პატარა ქვეყანას აქვს უდიდესი პოტენციალი და ძალიან დიდი შესაძლებლობები, – განაცხადა თბილისის მერმა კახა კალაძემ დედაქალაქის მთავრობის სხდომის გახსნისას.
მან საქართველოს ეროვნული ნაკრების წარმატება მიულოცა ფეხბურთელებსა და გულშემატკივრებს.
„მინდა, სრულიად საქართველოს, ყველა იმ ადამიანს, ვისაც უხარია ჩვენი ქვეყნის, სპორტსმენების, ფეხბურთელების წარმატება, მივულოცო ძალიან მნიშვნელოვანი გამარჯვება. მართლაც სასიხარულოა ის, რომ ჩვენი საფეხბურთო ეროვნული ნაკრები ევროპის 16 საუკეთესო გუნდს შორის მოხვდა, მერვედფინალში გავედით, რაც ძალიან მაგარია. პორტუგალია დავამარცხეთ 2:0. საუკეთესო თამაში აჩვენებს ჩვენმა ბიჭებმა, ყველას მინდა, მადლობა გადავუხადო და წარმატებები ვუსურვო შემდეგ შეხვედრაში.
მინდა, მადლობა ვუთხრა ყველა იმ გულშემატკივარს, ვინც ქომაგობდა ჩვენს ბიჭებს როგორც გერმანიაში, ასევე საქართველოში, მსოფლიოს სხვადასხვა ქვეყნიდან. მართლაც ძალიან დიდი მხარდაჭერა, ძალიან დიდი ენთუზიაზმი იყო და სასიხარულოა, რომ ჩვენ მოვახერხეთ ჯგუფიდან გასვლა. პირდაპირ შეიძლება ითქვას, რომ ფეხბურთმა ისევ გააერთიანა მთელი ქვეყანა და გვაჩუქა სიამაყის განცდა, რომ ამ პატარა ქვეყანას აქვს უდიდესი პოტენციალი და ძალიან დიდი შესაძლებლობები.
რა თქმა უნდა, ეს წარმატება შემთხვევით არ მოსულა. ეს არის თავდაუზოგავი შრომის, ძალისხმევის, მიზანდასახულობის შედეგი, რასაც თან ერთოდა რა თქმა უნდა, სახელმწიფოს მხრიდან მხარდაჭერა, თანადგომა“, – განაცხადა კახა კალაძემ.
საქართველოს ეროვნულმა ნაკრებმა პორტუგალია 2:0 დაამარცხა. ამ გამარჯვებით მან პლეი ოფის საგზური მოიპოვა. მერვედფინალში „ჯვაროსნები“ ესპანეთს შეხვდებიან. მატჩი 30 ივნისს, 23:00 საათზე დაიწყება.