პრემიერ-მინისტრის ანგარიში მიანიშნებს იმაზე, რა დინამიკითაც ხდება საქართველოს განვითარება. აქ უამრავი საკითხი იყო წამოჭრილი, მაგრამ ხაზგასმით მსურს აღვნიშნო ის მესიჯი, რომლითაც ბატონმა ირაკლი კობახიძემ დაასრულა თავისი მოხსენება და ეს მესიჯი არის ალბათ ყველაფრის შემკრები – ჩვენს ყველაზე დიდ ოცნებას და მიზანს – საქართველოს ტერიტორიულ მთლიანობას, სიღარიბის საბოლოოდ დაძლევას და ევროკავშირში ჩვენს აფხაზ და ოს თანამოქალაქეებთან ერთად 2030 წელს შესვლას ეხება. ამ მესიჯში თავმოყრილია ის დიდი შრომა და გზა, რომელიც საქართველოს ხელისუფლებამ ამ წლების განმავლობაში გაიარა და რა გზაც ჩვენ მომავალში გასავლელი გვაქვს, – განაცხადა საპარლამენტო უმრავლესობის წევრმა ირაკლი ქადაგიშვილმა პარლამენტის პლენარულ სხდომაზე პრემიერ-მინისტრის მოხსენებით გამოსვლის შემდეგ.
ირაკლი ქადაგიშვილის შეფასებით, ეს გზა ადვილი არ იქნება, მაგრამ ის, რომ ქვეყანა სიღარიბის დაძლევას ნაბიჯ-ნაბიჯ ახორციელებს, უკვე სახეზეა და ეკონომიკური ზრდაც არა მარტო ციფრებში გამოიხატება, არამედ გარკვეულწილად აისახება თითოეული ჩვენი თანამოქალაქის ცხოვრების დონეზეც.
მისივე თქმით, ყველაზე რთულად და ძნელად განსაჭვრეტი საკითხი ქვეყნის ტერიტორიული მთლიანობის აღდგენის საკითხია.
„ჩვენ ოფიციალურად გვაქვს გამოცხადებული და ძალიან დაბეჯითებით მივყვებით მშვიდობიანი გზით ქვეყნის რეინტეგრაციის პოლიტიკას. ეს არის ყველაზე რთული და ყველაზე ძნელი გზა. საქართველომ ამ გეოპოლიტიკური ტურბულენტობის პირობებში შეძლო და საერთაშორისო საზოგადოებასთან ერთად, მტკიცედ დაიკავა უკრაინაში აგრესიის დამგმობი პოლიტიკა, საერთაშორისო სანქციების შესრულების კუთხით მოწინავე სახელმწიფო ვართ, ამავდროულად მოვახერხეთ ის, რომ რუსეთთან უაზრო კონფრონტაციაში არ შევედით. შეიძლება დიდი გეოპოლიტიკური საჭადრაკო დაფისთვის ეს კონფრონტაცია მომგებიანი იყო, მაგრამ საქართველოსთვის ეს იყო ის უაზრობა, რაც ჩვენს ქვეყანას საბოლოოდ დაანგრევდა. ეს არ მოხდა იმიტომ, რომ აქ ჩვენმა ხელისუფლებამ გონივრული პოლიტიკა გაატარა. რადგან საქართველოს და მისი ხელისუფლების ნაბიჯები არის ზნეობრივი, პოლიტიკურად გამართული, ეროვნული ინტერესებიდან გამომდინარე, სწორედ ეს ზნეობრივი პოზიცია არის ყველაზე უფრო მტკიცე ტაქტიკა, რომელიც საქართველოს გაიყვანს საბოლოოდ სამშვიდობოზე და სწორედ ეს ნაბიჯები არის იმ გზის მკვლევი ნაბიჯები, რომლებიც, მათ შორის, საქართველოს 2030 წლისთვის ევროკავშირის სრულუფლებიანი წევრობის მიჯნაზე მიიყვანს. ეს გზა არ არის მარტო საქართველოს მხრიდან გასავლელი, ეს გზა არის ევროკავშირის მხრიდანაც გასავლელი“, – განაცხადა ირაკლი ქადაგიშვილმა.