ძველ შეკითხვებს გვისვამდა, ტყუილ შეკითხვებსაც, ინტრიგნულსაც, პირდაპირ ჩასაშლელად იყო მოსული,- ასე გამოეხმაურა მსოფლიოსა და ევროპის მრავალგზის ჩემპიონი გენადი კვირკველია ოლიმპიურ სასახლეში მკლავჭიდელთა ახალდაფუძნებული კავშირის ყრილობაზე „ტვ პირველის“ გადამღები ჯგუფის ქცევას.
„ყველანაირი საშუალება მივეცით, რომ გადაეღო, დასწრებოდა, როგორც სხვა ჟურნალისტები იყვნენ. დაესწრებოდა და გადაიღებდა კადრებს ჩვეულებრივად, ინტერვიუებს ჩაწერდა, მაგრამ ამ ჟურნალისტმა ეს არ მოისურვა. დარბოდა, ხან გამგეობის წევრებს მივარდა, ხან ფედერაციის პრეზიდენტობის კანდიდატს. ძველ შეკითხვებს გვისვამდა, ტყუილ შეკითხვებსაც, ინტრიგნულსაც, პირდაპირ ჩასაშლელად იყო მოსული. მათი მოტივია გაგლანძღონ და ხალხი ალაპარაკონ“,- აღნიშნა კვირკველიამ.
ორგანიზატორების ინფორმაციით, „ტვ პირველის“ გადამღებმა ჯგუფმა ოლიმპიურ სასახლეში მკლავჭიდელთა ახალდაფუძნებული კავშირის ყრილობაზე პროვოკაცია მოაწყო. სხდომაზე ფედერაციის პრეზიდენტის არჩევნები უნდა დაწყებულიყო, რა დროსაც, დარბაზში „ტვ პირველის“ კორესპონდენტი მარიამ გაფრინდაშვილი შევიდა და იქ მყოფებთან არათემატური კითხვების დასმას ცდილობდა.