მავრიტანიის სანაპირო დაცვამ ატლანტის ოკეანეში 89 მიგრანტის ცხედარი აღმოაჩინა. ამის შესახებ BBC იუწყება.
ცხრა ადამიანი, მათ შორის ხუთი წლის გოგონა გადარჩა, მაგრამ ათობით ადამიანი კვლავ დაკარგულად ითვლება.
როგორც გადარჩენილები ამბობენ, ისინი ერთი კვირის წინ სათევზაო ნავით სენეგალისა და გამბიის საზღვრიდან გამოვიდნენ და მავრიტანიისკენ მიცურავდნენ. ნავში საერთო ჯამში 170 ადამიანი იმყოფებოდა. ის მავრიტანიის სამხრეთ-დასავლეთ სანაპიროსთან ჩაიძირა.
BBC-ის ინფორმაციით, მავრიტანია მიგრანტებისთვის, რომლებსაც ევროპაში შეღწევა სურთ, მთავარ სატრანზიტო წერტილად ითვლება. გასულ წელს მის სანაპიროს ათასობით ნავი მიადგა. მავრიტანიიდან მიგრანტები ესპანეთის კანარის კუნძულებზე გადადიან. როგორც ესპანური მთავრობა იტყობინებოდა, გასულ წელს კანარის კუნძულებს 40 ათასი მიგრანტი მიადგა, რაც წინა წლის მონაცემებს ორჯერ აღემატება.