საქართველოს მორაგბეთა ნაკრების ყოფილმა კაპიტანმა, გიორგი ნემსაძემ ბათუმში გასამართ საქართველო – ფიჯის მატჩზე, კერძოდ, გუნდების შესაძლებლობებზე „დღის ქრონიკასთან“ ისაუბრა.
მისივე თქმით, დღევანდელი მატჩი ჩვენი ნაკრებისთვის ძალიან მნიშვნელოვანია.
„ბოლო პერიოდში რაღაც ისე ჩამოყალიბდა, რომ ჩვენ და ფიჯი, ასე ვთქვათ, ერთმანეთის კონკურენტები ვართ. გვახსოვს მსოფლიო ჩემპიონატისას გამოუყენებელი შანსი და გვაქვს რევანშის მოლოდინი. ფიჯის ნაკრებს ტრავმების გამო რამდენიმე წამყვანი მოთამაშე აკლია, საკმაოდ ძლიერი მოთამაშეები, თუმცა, სამწუხაროდ, ჩვენც გვაქვს დანაკლისი.
თამაში იქნება ძალიან მნიშვნელოვანი და საინტერესო. ჩვენ გვახსოვს აქ იტალიასთან თამაში და თუ რა როლი ითამაშა მაყურებელმა ამ თამაშზე. იმედი მაქვს, ისევ იგივე განწყობა იქნება, რაც იტალიასთან იყო“, – განაცხადა ნემსაძემ.
მისივე თქმით, ქართველი მორაგბეების მიზანია, ფიჯის ნაკრებს „გახსნილი თამაშის საშუალება“ არ მისცენ, რადგან მსოფლიო რაგბიში მათი ზედმეტსახელია „მფრინავი ფიჯელები“.
საქართველოს მორაგბეთა ნაკრები ზაფხულის პირველ ტესტ-მატჩს გამართავს. საქართველო – ფიჯის შეხვედრის პირდაპირი რეპორტაჟი ტელეკომპანია „იმედის“ ეთერში, 20:00 საათზე დაიწყება.