საქართველოს კულტურისა და სპორტის მინისტრმა თეა წულუკიანმა თბილისის ოპერისა და ბალეტის სახელმწიფო თეატრში გამართულ სამოქალაქო პანაშვიდზე ლიანა ისაკაძის ხსოვნას პატივი მიაგო.
მინისტრმა სამძიმარი გამოუცხადა გარდაცვლილის ოჯახს, მეგობრებსა და კოლეგებს.
დიდი მუსიკოსი მახათის მწერალთა და საზოგადო მოღვაწეთა პანთეონში დაკრძალეს.
სამოქალაქო პანაშვიდზე წაიკითხეს საქართველოს კათოლიკოს-პატრიარქის, უწმინდესისა და უნეტარესის, ილია მეორის სამძიმარი. სიტყვით გამოსვლისას საინტერესო ეპიზოდები ლიანა ისაკაძის ცხოვრებიდან და შემოქმედებიდან გაიხსენეს მისმა კოლეგებმა და ახლობლებმა: აკადემიკოსმა ვალერი ასათიანმა, თბილისის სახელმწიფო კონსერვატორიის რექტორმა გიორგი ვაჩნაძემ, ,,ნიჭიერთა ათწლედის” ხელმძღვანელმა ნოდარ ჟვანიამ, ხელოვნებათმცოდნეობის დოქტორმა, კონსერვატორიის ემერიტუს-პროფესორმა რუსუდან წურწუმიამ და სხვებმა.
ლიანა ისაკაძე გამორჩეული მუსიკალური მონაცემების გამო ადრეული ასაკიდან გამოჩნდა სცენაზე. როგორც კონკურსგარეშე მონაწილემ, მან ორჯერ მოიპოვა ლაურეატის წოდება: 1957 წელს (თბილისი, საქართველოს რესპუბლიკური კონკურსი) და 1960 წელს (ბაქო, ამიერკავკასიის მუსიკოს-შემსრულებელთა კონკურსი), 1961 წელს კი საბჭოთა კავშირის მუსიკოს-შემსრულებელთა კონკურსზე მეორე პრემიის მფლობელი გახდა.
19 წლისამ მიიღო პირველი პრემია მარგერიტ ლონგისა და ჟაკ ტიბოს სახელობის საერთაშორისო კონკურსზე პარიზში (1965 წ.) მოგვიანებით გახდა კიდევ ორი მნიშვნელოვანი საერთაშორისო კონკურსის: ჰელსინკიში სიბელიუსის სახელობის საერთაშორისო კონკურსის (I პრემია, 1970) და მოსკოვის ჩაიკოვსკის სახელობის საერთაშორისო კონკურსის (III პრემია,1970) ლაურეატი.
ლიანა ისაკაძე 1965 წლიდან დიდი წარმატებით მართავდა კონცერტებს ევროპის, აზიისა და ამერიკის ცნობილ საკონცერტო დარბაზებში. მისი მრავალფეროვანი რეპერტუარი მოიცავდა როგორც მსოფლიო კლასიკური მუსიკის ნიმუშებს, ასევე, ქართველ კომპოზიტორთა ნაწარმოებებს. არაერთმა ქართველმა კომპოზიტორმა, მათ შორის – ოთარ თაქთაქიშვილმა, სულხან ნასიძემ, სულხან ცინცაძემ მას მიუძღვნეს საკუთარი ნაწარმოებები და მათი პირველი შემსრულებელიც დიდი მევიოლინე იყო.
1981-97 წლებში ლიანა ისაკაძე იყო საქართველოს კამერული ორკესტრის დირიჟორი და სამხატვრო ხელმძღვანელი. გასული საუკუნის 80-იან წლებში მან დააარსა საერთაშორისო მუსიკალური ფესტივალი ბიჭვინთაში, რომელიც დიდი პოპულარობით სარგებლობდა. მანვე ჩაუყარა საფუძველი საახალწლო კონცერტებს თბილისში, რომლებიც მსმენელს დაუვიწყარ მუსიკალურ საღამოებს სთავაზობდა.
1994 წელს ლიანა ისაკაძის თაოსნობით გერმანიაში, ქალაქ ინგოლშტადტში, დაარსდა საქართველო-გერმანიის კულტურის ცენტრი, რომლის ბაზაზე დღემდე მოღვაწეობს ინგოლშტადტის ქართული კამერული ორკესტრი.
ლიანა ისაკაძე, როგორც გამორჩეული მუსიკოს-შემსრულებელი, შესულია „მე-20 საუკუნის 2000 საუკეთესო მუსიკოსის“ სიაში (კემბრიჯის საერთაშორისო ბიბლიოგრაფიული ცენტრი, 2001 წ.). ქართველ მსმენელს განსაკუთრებულად უყვარდა ლიანა ისაკაძე და მისი კონცერტები უმნიშვნელოვანესი კულტურული მოვლენა იყო საქართველოში. ეს, ერთი მხრივ, განპირობებული იყო მისი, როგორც უმაღლესი დონის მუსიკოს-შემსრულებლისადმი, დიდი ინტერესით და, ასევე, მისი უბადლო სცენური ხიბლით.