საფრანგეთის საპარლამენტო არჩევნების წინასწარი შედეგების გამოცხადების შემდეგ, პარიზსა და ქვეყნის სხვა ქალაქებში გამოსვლები დაიწყო. ამის შესახებ BBC წერს.
საფრანგეთის დედაქალაქში 8 ათასამდე ადამიანი შეიკრიბა, რესპუბლიკის მოედანზე კი, სადაც მემარცხენე „ახალი სახალხო ფრონტის“ მიტინგი იმართებოდა, არეულობა მოხდა. არჩევნების შედეგებით უკმაყოფილო დემონსტრანტებმა პოლიციის პროვოცირება სცადეს, დაამტვრიეს სკამები, ველოსიპედებს ცეცხლი წაუკიდეს, სამართალდამცველებს ქვები ესროლეს და ფოიერვერკები გაუშვეს. პოლიციამ მათ წინააღმდეგ ცრემლსადენი გაზი და ხმოვანი მაშხალები გამოიყენა.
საპროტესტო აქციები იყო ნანტსა და ლიონშიც.
წინასწარი მონაცემებით, საფრანგეთის საპარლამენტო არჩევნების მეორე ტურში „ახალი სახალხო ფრონტი“ იმარჯვებს. მეორე ადგილზე გავიდა პრეზიდენტ ემანუელ მაკრონის კოალიცია, მესამეზე კი მარინ ლე პენის „ეროვნული გაერთიანება“.