თურქეთი ევროპას მიგრანტების ნაკადით პრობლემების შექმნით ემუქრება. თურქეთის შინაგან საქმეთა მინისტრის სულეიმან სოილუს განცხადებით, ანკარასა და ამსტერდამს შორის კონფლიქტის გაგრძელების შემთხვევაში თურქეთი მზადაა საზღვარი გახსნას და ყოველთვიურად ევროპაში 15 ათასი არალეგალი მიგრანტი შეუშვას.
“მივმართავ ევროპას: თქვენ მანდ ასეთი მამაცები ხართ?! გინდათ, თავის ტკივილი გაგიჩინოთ და იმ 15 ათასს მიგრანტს გავუხსნათ გზას, რომლებსაც ჩვენ ყოველთვიურად არ ვუშვებთ?!”, – განაცხადა მინისტრმა.
ერთი წლის წინ ევროკავშირსა და თურქეთს შორის გაფორმებული ხელშეკრულებით, მიგრანტების მიღების სანაცვლოდ, თურქეთს 6 მილიარდი ევრო და ევროპაში უვიზო მიმოსვლა უნდა მიეღო.
მას შემდეგ რაც წელს ამსტერდამში შესვლაზე თურქეთის საგარეო საქმეთა მინისტრს უარი ეთქვა, ქვეყნებს შორის ურთიერთობა დაიძაბა და დიპლომატიური მისიები გაუქმდა.
ჩავუშოღლუ ამსტერდამში სააგიტაციო აქციაზე გამოსვლას გეგმავდა, სადაც პრეზიდენტისთვის უფლებამოსილების გაზრდასთან დაკავშირებულ რეფერენდუმზე უნდა ესაუბრა.