რუსეთის პრეზიდენტის ადამიანის უფლებათა საბჭოს წევრის ევა მერკაჩევის თქმით, 52 წლის ბიზნესმენი, იგორ კოტელნიკოვი, რომელსაც ბრალი რუსეთის თავდაცვის სამინისტროს მაღალი თანამდებობის პირებისთვის ქრთამის მიცემაში ედებოდა, მოსკოვის №4 წინასწარი დაკავების იზოლატორში გარდაიცვალა.
მერკაჩევი წერს, რომ გამოძიებამ კოტელნიკოვი მიიჩნია შუამავლად, რომელიც ქრთამის სანაცვლოდ, სამხედრო დეპარტამენტთან თანამშრომლობაში მყოფ მეწარმეებს სარფიანი გარიგებების დადების გარანტიას აძლევდა.
მისივე ცნობით, კოტელნიკოვი 8 ივლისს, დაახლოებით 11:00 საათზე გარდაიცვალა მას შემდეგ, რაც წინასწარი დაკავების იზოლატორის მეხუთე კორპუსის საკანში ცუდად გახდა. მისი გადარჩენა ვერ მოხერხდა. მანვე აღნიშნა, რომ №4 წინასწარი დაკავების იზოლატორის მეხუთე კორპუსში პატიმრები რთულ პირობებში იმყოფებიან.
“უფლებადამცველებმა წინასწარი დაკავების იზოლატორების შემოწმებისას არაერთხელ შენიშნეს, რომ ეს საკნები ხალხით არის სავსე. საკნები თავად ძალიან პატარაა, თბილ ამინდში იქ ცხელა, ზამთარში კი ცივა”. – წერს მერკაჩევი.
Telegram-არხი ВЧК-ОГПУ იყო ერთ-ერთი პირველი, ვინც კოტელნიკოვის გარდაცვალების შესახებ დაწერა. მათი ინფორმაციით, ФСБ-ს ოფიცრები არაერთხელ მივიდნენ ბიზნესმენთან და მოითხოვეს ჩვენების მიცემა თავდაცვის ყოფილი მოადგილის ტიმურ ივანოვისა და რუსეთის თავდაცვის სამინისტროს სხვა ჩინოვნიკების წინააღმდეგ. როდესაც ბიზნესმენმა უარი თქვა, “ზეწოლა დაიწყო წინასწარი დაკავების იზოლატორში” – კოტელნიკოვი გაგზავნეს საკანში, სადაც ის ცუდად გახდა.
აღსანიშნავია, რომ 9 ივლისს 62 წლის ასაკში გარდაიცვალა თავდაცვის სამინისტროს საჭიროებისთვის განკუთვნილი ობიექტების მშენებლობაზე პასუხისმგებელი, თავდაცვის მინისტრის ყოფილი მოადგილის, ტიმურ ივანოვის უშუალო დაქვემდებარების ქვეშ მყოფი პირი, რუსეთის თავდაცვის სამინისტროს სახელმწიფო ექსპერტიზის დეპარტამენტის უფროსი, მაგომედ ხანდაევი. უცნობია მისი გარდაცვალების გარემოებები.
მედია: რუსეთის მე-20 არმიის მეთაური, გენერალი სუხრაბ ახმედოვი თანამდებობიდან დაითხოვეს
აპრილის ბოლოს სახელმწიფო დიდი ოდენობით ქრთამის აღების ბრალდებით დააკავეს რუსეთის თავდაცვის მინისტრის, სერგეი შოიგუს მოადგილე ტიმურ ივანოვი. მოგვიანებით მედიაში გავრცელდა ინფორმაცია, რომ სინამდვილეში, ივანოვის წინააღმდეგ “სახელმწიფო ღალატის” მუხლით მიმდინარეობს გამოძიება.
14 მაისს დააკავეს შოიგუსთან დაახლოებული სამხედრო პირი, თავდაცვის სამინისტროს კადრების სამმართველოს ხელმძღვანელი იური კუზნეცოვი.
21 მაისს თაღლითობის ბრალდებით დააკავეს 58-ე არმიის ყოფილი მეთაური, გენერალ-მაიორი ივან პოპოვი. პოპოვი თანამდებობაზე ყოფნის დროს ხელმძღვანელობას აკრიტიკებდა, რის გამოც მას გენერალური შტაბის მეთაურმა, ვალერი გერასიმოვმა “პანიკიორი” უწოდა. გენერალ-მაიორი 2023 წლის ივლისში თანამდებობიდან გაათავისუფლეს.
23 მაისს ცნობილი გახდა, რომ დაკავებულია შეიარაღებული ძალების გენერალური შტაბის მეთაურის მოადგილე, კავშირგაბმულობის მართვის მეთაური, გენერალ-ლეიტენანტი ვადიმ შამარინი. მას დიდი ოდენობით ქრთამის აღებაში ედება ბრალი.
24 მაისს მოსკოვის სასამართლომ რუსეთის თავდაცვის სამინისტროს თავდაცვითი მომარაგების დეპარტამენტის ხელმძღვანელის, ვლადიმირ ვერტელეცკის დაკავების ორდერი გასცა. მაღალჩინოსანს თანამდებობის ბოროტად გამოყენებას ედავებიან.
გარდა ამისა, შოიგუს გადაყენების შემდეგ შეიცვალა მისი მოადგილე იური სადოვენკო. თანამდებობა ასევე დატოვა თავდაცვის სამინისტროს პრესმდივანმა როსიანა მარკოვსკაიამ.
24 მაისს თანამდებობიდან გადააყენეს რუსეთის მე-20 არმიის მეთაური, გენერალი სუხრაბ ახმედოვიც.
თავად შოიგუ ვლადიმირ პუტინმა თანამდებობიდან 12 მაისს გადააყენა, მისი ადგილი ანდრეი ბელოუსოვმა დაიკავა. ამჟამად ყოფილი თავდაცვის მინისტრი შოიგუ რუსეთის ფედერაციის უშიშროების საბჭოს მდივნის პოსტს იკავებს.