ანტვერპენის ფედერალურმა სასამართლო პოლიციამ (PJF), ტერორიზმის საკითხებში სპეციალიზირებული გამომძიებელი მოსამართლის მოთხოვნით, 25 ივლისს, ქალაქებში: ანტვერპენში, სერაინში, სენ-ჟოს-ტენ-ნუდეში, მენინში, ბურ-ლეოპოლდეში, ლიეჟში, კურტრეეში, გენტსა და ზონჰოვენში 14 ჩხრეკა ჩაატარა. ამ სპეცოპერაციის შემდეგ, დაკითხვაზე 7 პირი მიიყვანეს. გამომძიებელი მოსამართლე მოგვიანებით გადაწყვეტს, გამოიწერება თუ არა მათზე დაპატიმრების ორდერი. შვიდივე დაკავებული ეჭვმიტანილია „ტერორისტული ჯგუფის საქმიანობაში მონაწილეობაში, ტერორიზმის დაფინანსებასა და ტერაქტის მომზადებაში“. როგორც ხუთშაბათს საღამოს ნიდერლანდების საზოგადოებრივმა მაუწყებელმა VRT-მ განაცხადა, „სანდო წყაროდან შეიტყო, რომ ეჭვმიტანილები ასაფეთქებელი ნივთიერებების პრეკურსორებს (ქიმიურ ნივთიერებებს – რედაქტორის შენიშვნა) ეძებდნენ“.
რისკი, განსაკუთრებით პარიზის ოლიმპიური თამაშების ფონზე, საჭირო არ არის
შეგახსენებთ, რომ გასული წლის 16 ოქტომბერს ფეხბურთის შვედ გულშემატკივრებზე თავდასხმის შემდეგ, უსაფრთხოების რისკი ბელგიაში არსებულ 4-დონიან შკალაზე 3-ით („სერიოზული საფრთხე“) განისაზღვრა. ბელგიის უსაფრთხოების ანალიზის საკოორდინაციო ორგანომ (OCAM) მე-3 დონე მიმდინარე ზაფხულის ბოლომდე უცვლელი დატოვა და ეს გადაწყვეტილება რამდენიმე ფაქტორით, მათ შორის, მასშტაბური სპორტული ღონისძიებების გამართვით, ახსნა. ბელგიის ფრანგულენოვანი ტელე-რადიო მაუწყებლის (RTBF) ხელთ არსებული ინფორმაციით, პოლიციის მიერ ჩატარებული სპეცოპერაციის დრო, ნაწილობრივ მაინც, პარიზის ოლიმპიადის მოახლოვებას უკავშირდება და იმაზე მიუთითებს, რომ უსაფრთხოების სამსახურებს რისკების გაწევა არ სურთ. თუმცა, ამ ეტაპზე არაფერი მიანიშნებს იმაზე, რომ ეჭვმიტანილებს ოლიმპიადა „აინტერესებდათ“. „მათი კონკრეტული მიზნები ჯერ დადგენილი არ არის”, – აღნიშნა ბელგიის ფედერალურმა პროკურატურამ, რომელიც იქვე დასძინა, რომ გამოძიების ინტერესებიდან გამომდინარე, დამატებით ინფორმაციას არ გაამჟღავნებს.
ისლამისტური საფრთხეები ევროპაში
პარალელურად, დაპატიმრებები, რომელშიც რამდენიმე სადაზვერვო და უსაფრთხოების სამსახური მონაწილეობდა, ევროპის სხვა ქვეყნებშიც განხორციელდა. ამ ოპერაციების კონტექსტი პოტენციური ისლამისტური საფრთხეა. რამდენიმე ეჭვმიტანილი წარმომავლობით ცენტრალური აზიიდან არის, სადაც ტერორისტული დაჯგუფება „ისლამური სახელმწიფო“ თავის ფილიალზე – „ხორასანის ისლამურ სახელმწიფოზე“ – დაყრდნობით მოქმედებს. გერმანიის ფედერალურმა პროკურატურამ რუსეთის ორი მოქალაქის დაკავების შესახებ გაავრცელა ინფორმაცია, რომლებიც „ისლამური სახელმწიფოს” ფინანსურ მხარდაჭერაში არიან ეჭვმიტანილნი. ჩატარდა შვიდი ჩხრეკა. როგორც RTBF-მა შეიტყო, არსებობს კავშირი ამ გერმანულ საქმესა და ბელგიაში განხორციელებულ დაკავებებს შორის, რომელიც, ნაწილობრივ, ასევე ტერორიზმის დაფინანსებას უკავშირდება. გერმანიის ფედერალური პროკურატურის პრეს-რელიზის თანახმად, დაკავებულთა „მიზანი იყო გერმანიასა და ევროპის სხვა ქვეყნებში თანხების შეგროვება და ამ თანხების „ისლამური სახელმწიფოს“ განკარგულებაში გადაცემა“. პრეს-რელიზში ასევე ნათქვამია, რომ სოციალური მედიის საშუალებით შეგროვებულმა შემოწირულობებმა „განსაკუთრებული სარგებელი „ისლამური სახელმწიფოს“ მებრძოლებს მოუტანა“. ამ კონტექსტში, გერმანიის ხელისუფლება ტერაქტის მოსამზადებელ ქმედებებზე არაფერს ამბობს.