ეკლესიას დაცვა არ სჭირდება, აქეთ გვიცავს ყველას, უბრალოდ დღის წესრიგში ეს თემა დადგა, რადგან ვნახეთ როგორი შეტევაა მართლმადიდებლობაზე, ეკლესიაზე, პატრიარქზე, ზოგადად ჩვენს ქვეყანაზე, – განაცხადა რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველმა მოადგილემ ირაკლი ზარქუამ.
წამყვანმა დეპუტატს ჰკითხა, რისგან იცავს საქართველოს ეკლესიის როლისა და მისი დამოუკიდებლობის გასაძლიერებლად, საკონსტიტუციო ცვლილებებზე ჩანაწერი ეკლესიას და თუ იქნება საკონსტიტუციო ჩანაწერის შემდეგ კანონში გაწერილი დებულებები, რომელიც დამატებით შეიძლება ამოქმედდეს ეკლესიასთან დაკავშირებით.
„ეკლესიას დაცვა არ სჭირდება, აქეთ გვიცავს ყველას, უბრალოდ დღის წესრიგში ეს [საკონსტიტუციო ცვლილებების ] თემა დადგა, რადგან ვნახეთ როგორი შეტევაა მართლმადიდებლობაზე, ეკლესიაზე, პატრიარქზე, ზოგადად ჩვენს ქვეყანაზე. გამომდინარე იქიდან, რომ ამ მანქურთების მთავარი ამოსავალი წერტილია რამენაირად იდენტობა დაგვაკარგვინონ, გაგვხადონ ერი წარსულის, რელიგიის გარეშე, ჩვენი ნაბიჯი იყო, კიდევ უფრო მეტად წარმოვაჩინოთ, რომ მართლმადიდებლობა, ეკლესია და საქართველო – ეს ერთიანობაა და ცალ-ცალკე გამორიცხულია. არ იქნება მართლმადიდებელი ერი, არ იქნება საქართველო. ჩვენ ამის ხაზგასმა გვინდა. ეკლესიამ საუკუნეების განმავლობაში პრობლემებს გაუძლო, ის დგას ქართველ ხალხთან ერთად და ჩვენ ამით ვამაყობთ. ეს ნაბიჯი ჩვენი მხრიდან არის კიდევ ერთხელ იმის დემონსტრირება, რომ საკონსტიტუციო ჩანაწერშიც ავსახოთ, რომ მართლმადიდებლობა, ეკლესია და საქართველო განუყოფელია“, – აღნიშნა ზარქუამ.