აფეთქებების მომაკვდინებელმა ტალღამ „ჰეზბოლას“ რიგებში 37 ადამიანი იმსხვერპლა, თითქმის 3 000 მშვიდობიანი მოქალაქე კი დაშავდა, რამაც ახლო აღმოსავლეთში სრულმასშტაბიანი ომის საფრთხე გაზარდა.
ათეულობით დაღუპული და ათასობით დაჭრილი – სამშაბათს, 17 სექტემბერს, ბეირუთის სამხრეთ გარეუბანში, ასევე ლიბანის სამხრეთ და აღმოსავლეთ ნაწილში ერთდროული აფეთქება მოხდა პეიჯერის შეტყობინებების ქსელში, რომელსაც ლიბანური დაჯგუფება„ჰეზბოლა“ იყენებდა. ლიბანის ჯანდაცვის სამინისტროს ინფორმაციით, დაიღუპა 12, ხოლო ასობით ადამიანი დაშავდა. იგივე წყაროს ცნობით, მეორე დღეს მომხდარი აფეთქებების ახალმა ტალღამ, რომელიც ამჯერად რაციებზე იყო მიმართული, სულ მცირე, 25 ადამიანი იმსხვერპლა. ორ დღეში დაღუპულთა რაოდენობამ 37-ს მიაღწია, დაშავებულებისამ კი 2 900-ს გადააჭარბა. ლიბანის ჯანდაცვის მინისტრის თქმით, დაღუპულთა უმეტესობას „ჭრილობები „სახის მკლავის, მუცლის და თვალის არეში ჰქონდა მიღებული“.
„ჰეზბოლას“ წევრები და ირანის ელჩი
მსხვერპლთა უმეტესობას „ჰეზბოლას“ მებრძოლი მამაკაცები შეადგენენ, რომლებსაც, აფეთქების მომენტში, პეიჯერები ან რაციები თან ჰქონდათ. პრაქტიკულად არ არსებობს ინფორმაცია, ვინ არიან ისინი. ლიბანის ჯანდაცვის მინისტრის, ფირას აბიადის თქმით, დაღუპულების ვინაობის შესახებ პირველი ინფორმაცია ცხედრების იდენტიფიცირებისას გაჩნდა. ხუთშაბათს, ბეირუთსა და მის შემოგარენში, რამდენიმე დაკრძალვა გაიმართა.
ერთ-ერთი არასამთავრობო ორგანიზაციის ცნობით, დაჭრილებს შორის არის სირიაში მყოფი„ჰეზბოლას“ 14 წევრი. ირანული ტელევიზიის ინფორმაციით კი, პეიჯერის აფეთქების შედეგად, ბეირუთში ირანის ელჩი, მოჯთაბა ამანიც დაიჭრა.
თანმდევი მსხვერპლი
ლიბანის ხელისუფლების ცნობით, დაღუპულთა შორის არის „ჰეზბოლას“ დეპუტატის ვაჟი. „ჰეზბოლასთან“ დაახლოებულმა წყარომ კი სააგენტო „ფრანს პრესს“ განუცხადა, რომ კიდევ ერთი დეპუტატის ვაჟი დაიჭრა, ისევე როგორც ლიბანის ისლამისტური მოძრაობის უსაფრთხოების სამსახურის მაღალჩინოსნის შვილები. ლიბანის ხელისუფლებამ ამ ინფორმაციაზე კომენტარი არ გააკეთა. „რამდენიმე დაჭრილი სირიაში მკურნალობს, ზოგი კი ირანში გადაიყვანეს“, – აცხადებს ფირას აბიადი. ოთხშაბათს მან ასევე აღნიშნა, რომ გარდაიცვალა ჯანდაცვის ოთხი მუშაკი, რომლებიც „ბეირუთის სამხრეთ გარეუბანში მდებარე კერძო საავადმყოფოებში მუშაობდნენ“.
მოკლულია ორი, 9 და 11 წლის ბავშვი
9 წლის გოგონა, ფატიმა აბდულა მამის პეიჯერის აფეთქების შედეგად დაიღუპა. „ფატიმა სამზარეულოში იყო, როდესაც მაგიდაზე დადებულ პეიჯერში ზარის ხმა გაისმა. მან მოწყობილობა მამამისთან წასაღებად აიღო და ხელში ეჭირა, როდესაც ის აფეთქდა. ფატიმას სახე დაუმახინჯდა და ოთახი სისხლით აივსო“, – მოუყვა მისი ერთ-ერთი დეიდა „ნიუ იორკ ტაიმსს“.
ამერიკული გამოცემის ჟურნალისტები გოგონას დაკრძალვას დაესწრნენ, რომელიც ლიბანის ბექაას ხეობაში, სირიის საზღვარზე მდებარე სოფელში გაიმართა. ეს დასახლება იმით არის ცნობილი, რომ „ჰეზბოლას“ დასაყრდენს წარმოადგენს. „მგლოვიარეთა უმეტესობას ფატიმას კლასელები შეადგენდნენ, მათი სახეები მწუხარებით იყო აღსავსე და პატარა მეგობრის ძალადობრივი სიკვდილით გამოწვეული შოკი ეტყობოდა“, – წერს „ნიუ იორკ ტაიმსი“. დაღუპული გოგონას დეიდის თქმით, ტრაგედიის დროს ფატიმა სკოლიდან „ახალი დაბრუნებული იყო“.
ლიბანის ჯანდაცვის მინისტრმა, რომელსაც ამერიკული გაზეთი ციტირებს, ოთხშაბათს მიყენებული დაზიანებების შედეგად მეორე ბავშვის გარდაცვალების შესახებაც გააკეთა განცხადება. 11 წლის ბავშვის სახელია ბილალ კანჯი.