საფრანგეთის პარლამენტის ქვედა პალატამ უარყო ულტრამემარცხენე პარტიის „დაუმორჩილებელი საფრანგეთი“ პრეზიდენტ ემანუელ მაკრონის იმპიჩმენტის პროცედურა. ინფორმაციას Le Figaro ავრცელებს.
იმპიჩმენტის საკითხი იურიდიული კომიტეტის სხდომაზე გავიდა. პროცედურის უარყოფას 54 დეპუტატმა დაუჭირა მხარი, ხოლო 15 წინააღმდეგი იყო.
როგორც გამოცემა ამტკიცებს, ინიციატივა შესაძლოა პლენარულ სხდომაზე გავიდეს, თუმცა ამას სჭირდება ყველა საპარლამენტო ჯგუფისა და ფრაქციის ხელმძღვანელის თანხმობა.
ამის ალბათობა ძალიან დაბალია, იმიტომ რომ, როგორც Le Figaro იუწყება, მაკრონის იმპიჩმენტს „ახალი სახალხო ფრონტის“ ბლოკში შემავალი პარტიებიდან მხოლოდ „დაუმორჩილებელი საფრანგეთი“ უჭერს მხარს.
იმპიჩმენტის პროცედურასთან დაკავშირებული ინიციატივით პარტია „დაუმორჩილებელი საფრანგეთი“ მას შემდეგ გამოვიდა, რაც საფრანგეთის პრეზიდენტმა პრემიერ-მინისტრად 7 ივლისის არჩევნებში გამარჯვებული კოალიციის მემარცხენე კანდიდატის ლუსი კასტეს დანიშვნაზე უარი განაცხადა.
მემარცხენეებმა პირველი პირის ეს გადაწყვეტილება საფრანგეთის რესპუბლიკის ისტორიაში ძალისმიერი გადატრიალების უპრეცედენტო მცდელობად შეაფასეს.