სამგზავრო ტრანზიტული მატარებელი მოსკოვი-კალინინგრადი, რომელზეც არასანქცირებული რუსული წარწერები იყო გაკეთებული, ლიეტუვას ტერიტორიაზე მხოლოდ მას შემდეგ შეუშვეს, რაც მესაზღვრეების მოთხოვნით, მატარებლის თანამშრომლებმა ეს წარწერები წაშალეს. ზემოთ მოყვანილი ინფორმაცია ხუთშაბათს, 3 ოქტომბერს, ლიეტუვას სახელმწიფო საზღვრის დაცვის სამსახურმა (VSAT) გაავრცელა.
მატარებელი, რუსული არმიის სიმბოლოებითა და პროვოკაციული წარწერებით, ბელარუსის „კენას“ სარკინიგზო სასაზღვრო-გამშვებ პუნქტზე ოთხშაბათს შევიდა.
ლიეტუველმა მესაზღვრეებმა ერთ-ერთ ვაგონზე შენიშნეს ასო Z, რომელიც უკრაინაში რუსეთის ომის სიმბოლოა, და შავი საღებავით გაკეთებული მინაწერი ZOV. სხვა ვაგონზე ასევე იყო წარწერა რუსულ ენაზე: „Вильнюс – город России“ („ვილნიუსი რუსეთის ქალაქია“).
მატარებლის თანამშრომლებმა ვერ ახსნეს, სად და როდის გაკეთდა ეს წარწერები. ლიეტუველმა მესაზღვრეებმა მათ მოსთხოვეს, დაუყოვნებლივ წაეშალათ წარწერები და გააფრთხილეს ისინი, რომ წინააღმდეგ შემთხვევაში, მგზავრებს სხვა ვაგონებში გადასვლა მოუწევდათ, რადგან წარწერებიანი ვაგონები ჩაიხსნებოდა და ლიეტუვაში ვერ შევიდოდა.
მატარებლის თანამშრომლებმა წარწერები ლიეტუველი მესაზღვრეების მეთვალყურეობის ქვეშ წაშალეს. მგზავრთა შემოწმების ყველა სავალდებულო პროცედურის დასრულების შემდეგ, მატარებელს უფლება მიეცა, ტრანზიტი ლიეტუვას გავლით საბოლოო დანიშნულების ადგილამდე გაეგრძელებინა.