აქ არ არის საუბარი ერთი კონკრეტული ადამიანის მიერ ჩადენილ რაღაც სამართლებრივ გადაცდომაზე ან დანაშაულზე, აქ საუბარია უკვე პოლიტიკურ ტრენდზე და ტენდენციაზე, რომელსაც „კოლექტიური ნაცმოძრაობა“ საქართველოში ახორციელებს, – განაცხადა რეგიონული პოლიტიკისა და თვითმმართველობის კომიტეტის თავმჯდომარემ, საპარლამენტო უმრავლესობის წევრმა ირაკლი ქადაგიშვილმა გადაცემაში „იმედი LIVE“.
„ეს პოლიტიკური ტრენდი არის მაგალითად რაც ჩვენ ამ არჩევნების დასრულების შემდეგ ვიხილეთ. როდესაც პირდაპირ, ყოველგვარი მტკიცებულების, ერთი ფაქტის და ერთი არგუმენტის გარეშე თქვეს, რომ არჩევნები არ შედგა, გაყალბდა და ვიწყებთ რევოლუციას. ეს ხომ მხოლოდ დღეს არ მოხდა, წინა არჩევებზეც ანალოგიური შედეგები ვიხილეთ. უბრალოდ დღეს ამას განსაკუთრებული სიმძაფრე მიეცა გამომდინარე იქიდან, რომ ამ არჩევნებში „ნაციონალური მოძრაობის“ გამარჯვებისთვის ჩართული იყო ძალიან დიდი უცხოური რესურსი. დამარცხების შემდეგ ამ უცხოური რესურსის დაკვეთით და თანამონაწილეობით დაიწყო „ნაციონალურმა მოძრაობამ“ დემოკრატიული ინსტიტუტების ნგრევა.
არჩევნები, რომელიც ჩატარდა თანამედროვე ტექნოლოგიებით, რომელთან დაკავშირებითაც არანაირი სერიოზული პრეტენზია მათ შორის არც ერთ საერთაშორისო დამკვირვებელს არ გამოუთქვამს, ვგულისხმობ ისეთ პრეტენზიას, რომელსაც შეეძლო არჩევნების შედეგებზე რაიმე ზეგავლენა მოეხდინა. რეკომენდაცია ყველა არჩევნების შემდეგ არსებობს და არც ერთი ეს რეკომენდაცია არ წარმოადგენს ისეთ რამეს, რომლის შესრულებაც ჩვენს ხელისუფლებას არ ხელეწიფება.
ასეთი პირობების მიუხედავად, როდესაც შენ ცდილობ, რომ ქვეყანაში სწორედ ხალხის ნება, დემოკრატია დაანგრიო, ჩამოანგრიო და გადატრიალების გზით ამ საერთაშორისო, ლიბერალური მოძრაობის, თუ „დიფ სთეიტი“ თუ „ომის პარტია“, რომელი ტერმინითაც გნებავთ გავაერთიანოთ ეს შემოტევა ქართულ დემოკრატიაზე და ქართულ სახელმწიფოსა და სუვერენიტეტზე, რომ გინდა ეს სისტემურად აქციო მუდმივად, რა თქმა უნდა ამას სჭირდება არა მარტო ვიღაცა ერთის მიერ ჩადენილი რაღაც კონკრეტული კორუფციული თუ სისხლის სამართლებრივი დანაშაული, არამედ ამას სჭირდება პოლიტიკური შეფასება და პოლიტიკური დასკვნა“, – აღნიშნა ირაკლი ქადაგიშვილმა.
