„ნაცების“ გასამართლება 2012 წლიდან მოყოლებული ჩვენი მოსახლეობის აბსოლუტური უმრავლესობის დაკვეთა იყო, თუმცა მაშინ ჩვენ გვაიძულეს ფაქტობრივად კოჰაბიტაცია, გვაიძულეს რამდენიმე მინისტრის დანიშვნა და ა.შ. მაშინ პოლიტიკურად ძლიერი და სუვერენული ქვეყანა ჯერ არ ვიყავით, როგორიც დღეს ვართ“, – ამის შესახებ საპარლამენტო უმრავლესობის წევრმა, ლევან მაჭავარიანმა განაცხადა.
მისი თქმით, უკვე დღეს ქვეყანა არავის კარნახით არ მოქმედებს.
„პარტნიორებისგან რჩევებს, თხოვნებს, რა თქმა უნდა, ვითვალისწინებთ, მაგრამ რასაც ვთვლით, რაც არის საჭირო ჩვენი ქვეყნის ეროვნული ინტერესებისთვის, ზუსტად ისე ვმოქმედებთ, ასეთი ტიპის გადაწყვეტილებებს საქართველოში ვიღებთ. დღეს ძალიან ძლიერად ვართ, მზად ვართ, ეს ნაბიჯი გადავდგათ, შევასრულოთ ის დაკვეთა, რაც მოდის ჩვენი მოსახლეობისგან. ეს იყო წინასაარჩევნოდ ჩვენი ერთ-ერთი დაპირებაც „ნაცების“ გასამართლების თემა. ვაჟღერებდით, რომ თუ საკონსტიტუციო უმრავლესობას ავიღებდით, დავაყენებდით ამ საკითხს დღის წესრიგში, ვინაიდან მათი გარე პატრონები ვერ ჩაერეოდნენ ამ პროცესებში. თუმცა, იმდენად ძლიერად ვგრძნობთ თავს, რომ საკონსტიტუციო უმრავლესობის არქონის მიუხედავად, ამ პროცესს მაინც აღვასრულებთ და ის ასობით ათასი ოჯახი, რომელმაც თავის თავზე განიცადა ის რეჟიმი, სისხლიანი რეჟიმი, რაც ცხრა წლის განმავლობაში მოქმედებდა, ვალდებულები ვართ, უპირველესად მათ წინაშე, რომ დაუსჯელი არავინ დარჩეს. ამ ყველაფერს აქვს ორი მიზეზი – ერთია სამართლებრივი. სამართალმა უნდა იზეიმოს და ყველაფერს თავისი სახელი უნდა დაერქვას“, – განაცხადა ლევან მაჭავარიანმა.
ლევან მაჭავარიანმა რამდენიმე თემა ჩამოთვალა, თუ რატომ არის, მისი თქმით, საზოგადოების მხრიდან „ნაციონალური მოძრაობის“ გასამართლების დაკვეთა.
„როგორ აღმოგვაჩინეს რუსეთთან ომში? რატომ აღუდგინეს ე.წ. სამხრეთ ოსეთის ავტონომიური ოლქი და საზღვრები მოუხაზეს, სწორედ ამ საზღვრებით მიმდინარეობს დღეს ბორდერიზაციის პროცესი, რომელიც ასეთი არასასიამოვნოა ჩვენი ქვეყნისთვის. რატომ შეუცვალეს კოდორს სტატუსი? რატომ მოაწერეს რეზოლუციას ხელი წაგებული ომიდან ორ თვეში და ჩვენს სამხედროებს დააბრალეს ომის დანაშაულების ჩადენა და დაწყება? რატომ დაეთანხმნენ ტალიავინის დასკვნას, სადაც პირდაპირ შავით თეთრზე დაადასტურეს, რომ თურმე საქართველომ შექმნა ყველანაირი სამართლებრივი საფუძველი, რომ რუსეთს განეხორციელებინა საქართველოში აგრესია? დანარჩენი ის თემები, რომელიც მათ ყოველდღიურობას წარმოადგენდა – სისტემური წამება, გაუპატიურება, ადამიანების ჩაგვრა, საძინებლებში თვალთვალი და შემდეგ კასრების თემა გახსოვთ, დაახლოებით, 5000 ასეთი ჩანაწერი გავანადგურეთ, როგორც კი ხელისუფლებაში მოვედით. ბიზნესის სისტემური რეკეტი, ტელევიზიების მითვისება, ახალგაზრდების ქუჩაში ხოცვა და ა.შ. – შესაბამისად მათ პასუხი უნდა აგონ. ჯობდა ეს ყველაფერი 2012 წელს მომხდარიყო, თუმცა განვმარტე რატომაც არ იყო ეს შესაძლებელი. სჯობს გვიან, ვიდრე არასდროს და ახლა არის ის მომენტი, როდესაც რეჟიმი პასუხს აგებს ამ ყველა დანაშაულზე, რაც აქვს ჩადენილი“, – განაცხადა ლევან მაჭავარიანმა.
მისი თქმით, სამართლიანობის აღდგენა ერთი მიზეზია, თუმცა არის მეორე მიზეზიც.
„დღეს კოლექტიური „ნაცმოძრაობა“ თავიანთი მართული მედიასაშუალებებით ცდილობენ, იმ ახალგაზრდების ტვინი არიონ, რომლებსაც ემოციის დონეზე არ ახსოვთ პროცესები ან საერთოდ პატარები იყვნენ და არ ახსოვთ. „ქართულ ოცნებას“ რეჟიმს ეძახიან, უნდათ, რომ ახალგაზრდებს ეს თავში ჩაუბეჭდონ. ექვსთვიანი პროცესი იქნება, საგამოძიებო კომისია იმუშავებს, რის შემდეგადაც თავის რეკომენდაციებს ფაქტებზე დაყრდნობით გადასცემს პროკურატურას და ყველა შესაბამისს უწყებას. ისეთი პროცესი იქნება, სადაც ყველა ეს ახალგაზრდა დაინახავს, რეალურად რას ნიშნავს რეჟიმი, ტოტალიტარული და ავტორიტარული რეჟიმი. იმასაც შევახსენებ საზოგადოებას, რომ სტრასბურგის სასამართლოსაც აქვს დადგენილი ადამიანების უფლებების ის დარღვევა, რაც ხორციელდებოდა იმ ცხრა წლის განმავლობაში. ამას ჰქონდა სისტემური ხასიათი და მთელი სახელმწიფო სტრუქტურები იყო ჩართული. ჩვენ ხაზგასმით აღვნიშნავთ, რომ ომის თემასთან დაკავშირებით რაც იქნება გამოძიებული, ეს არ ეხება არც სამხედროებს, არც სამხედრო მეთაურებს, ეს ეხება მხოლოდ დამკვეთებს, მხოლოდ იმ ადამიანებს, ვინც ავანგარდში იდგა იმ რეჟიმის და რომლებმაც ჩვენი ქვეყანა ასეთ უბედურებაში შეათრიეს“, – განაცხადა ლევან მაჭავარიანმა.