მარკო რუბიოს განცხადების დეტალებს არ ვიცნობ. რაც შემიძლია ვთქვა, უკრაინა ამარცხებს რუსეთს და დაამარცხებს საბოლოო ჯამში, – ამის შესახებ „კოალიცია ცვლილებებისთვის“ ერთ-ერთმა ლიდერმა, ნიკა გვარამიამ განაცხადა.
ნიკა გვარამიას კითხვა დაუსვეს აშშ-ის სახელმწიფო მდივნის, მარკო რუბიოს განცხადებაზე, რომელმაც თქვა: „ვლადიმერ პუტინმა ჩაიდინა საშინელება, მაგრამ არ იყო გულწრფელობა, როდესაც ხალხს რაღაცნაირად დავაჯერეთ, თითქოს უკრაინას შეეძლო არა მხოლოდ რუსეთის დამარცხება, არამედ მისი განადგურება“.
ნიკა გვარამიას თქმით, იმედოვნებს, რომ აშშ-ის პრეზიდენტის ახალი ადმინისტრაცია გააგრძელებს წინა ადმინისტრაციის პოლიტიკას უკრაინასთან დაკავშირებით.
„პირველი, რაც შემიძლია ვთქვა, უკრაინა ამარცხებს რუსეთს და დაამარცხებს საბოლოო ჯამში. მე, მართალი გითხრათ, ამ განცხადების დეტალებს არ ვიცნობ. ის ტექსტი, რომელიც თქვენ წამიკითხეთ, მე ამ ტექსტს სრული მოცულობით ნამდვილად არ ვეთანხმები და არ მიჭირს ამის თქმა. მე ვფიქრობ, რომ უკრაინასთან დაკავშირებით ამერიკის წინა ადმინისტრაციის პოლიტიკა იყო აბსოლუტურად სწორი და იმედი მაქვს, რომ ეს ადმინისტრაციაც ამ ხაზს გააგრძელებს“, – განაცხადა გვარამიამ.