საქართველოს ნაკრები დღეს რაგბი ევროპის 2025 წლის ჩემპიონატს დაიწყებს. პირველი ტურის შეხვედრაში ქართველი მორაგბეების მეტოქე ტურნირის დებიუტანტი შვეიცარიის ეროვნული გუნდი იქნება.
„ბორჯღალოსნებმა“ ჩემპიონატის პირველ თამაშამდე ვარჯიში ჩაატარეს. ტრავმის გამო გუნდს ვერ ეხმარებიან გიორგი შველიძე და თედო აბჟანდაძე, ნაკრების კაპიტანი ამჯერად ბექა საღინაძე იქნება.
შვეიცარიელებთან თამაშის შემდეგ ქართველი მორაგბეები 8 თებერვალს ნიდერლანდების გუნდს მიიღებენ, 16 თებერვალს კი სტუმრად ესპანელებთან ითამაშებენ.
ჯგუფიდან ნახევარფინალურ ეტაპზე მოხვედრა 2027 წლის მსოფლიოს თასზე თამაშის გარანტიაა, რადგან საგზურს პირდაპირ 4 საუკეთესო გუნდი იღებს.
თამაშზე დასასწრები ბილეთები სრულად გაყიდულია. საქართველო-შვეიცარიის მატჩი ავჭალის სტადიონზე 16:00 საათზე დაიწყება. ტელეკომპანია „იმედი“ გულშემატკივარს პირდაპირ რეპორტაჟს შესთავაზებს.