„ინფორმაციის თავისუფლების განვითარების ინსტიტუტის“ (IDFI) დამფუძნებელი გიორგი კლდიაშვილი თბილისის საქალაქო სასამართლოს მოსამართლემ, ნინო ენუქიძემ ადმინისტრაციულ სამართალდამრღვევად ცნო და 5000-ლარიანი ჯარიმა დააკისრა.
მას შინაგან საქმეთა სამინისტრო რუსთაველის გამზირზე გზის გადაკეტვის 4 ეპიზოდში ედავებოდა. შსს-ს წარმომადგენელი თვლიდა, რომ 23 და 24 დეკემბერს, ასევე 4 და 6 იანვარს რუსთაველის გამზირის გადაკეტვისთვის აქციის მონაწილეთა საკმარისი რაოდენობა არ იყო და გზა ხელოვნურად გადაიკეტა.
როგორც კლდიაშვილმა განაცხადა, საპროტესტო აქციებზე თითქმის ყოველდღიურად დადის და სადავო დღეებში ხალხის რაოდენობა გზის გადაკეტვის ლეგიტიმურ საფუძველს იძლეოდა.
კლდიაშვილის ადვოკატი გიორგი დავითური მიიჩნევს, რომ საქმეში არსებული მტკიცებულებები, კერძოდ, 112-ის გარე სამეთვალყურეო კამერების კადრები მტკიცებულებებად არ უნდა ჩათვლილიყო. მისივე თქმით, კადრების ნაწილში საერთოდ ვერ ხდებოდა კლდიაშვილის იდენტიფიცირება, ნაწილი კი ახლო ხედით იყო გადაღებული და ადგილმდებარეობის გარკვევა შეუძლებელი იყო.
მანამდე ადვოკატმა ოთხი სხვადასხვა ეპიზოდის ერთ წარმოებად გაერთიანება მოითხოვა, შუამდგომლობა მოსამართლე ნინო ენუქიძემ დააკმაყოფილა. არ დაკმაყოფილდა კლდიაშვილის ადვოკატის მოთხოვნა კონკრეტული სამართალდამცველების გამოკითხვასთან დაკავშირებით.
