უკრაინის პრეზიდენტმა, ვოლოდიმირ ზელენსკიმ განაცხადა, რომ მზად არის, გააფორმოს შეთანხმება აშშ-ის პრეზიდენტთან, დონალდ ტრამპთან, რომლის მიხედვითაც, კიევი აშშ-ს მიაწვდის იშვიათ ლითონებსა და სხვა მინერალებს, სანაცვლოდ კი მიიღებს ფინანსურ მხარდაჭერას ომის ძალისხმევისთვის. ინფორმაციას ამის შესახებ სააგენტო Reuters-ი ავრცელებს.
ტრამპმა, რომლის ადმინისტრაციაც უკრაინასა და რუსეთს შორის ომის სწრაფ დასრულებას ესწრაფვის, ეს იდეა ორშაბათს წამოაყენა.
„თუ ვსაუბრობთ შეთანხმებაზე, მაშინ მოდით, გავაფორმოთ შეთანხმება, ჩვენ მხოლოდ მხარს ვუჭერთ ამას“, – განუცხადა ზელენსკიმ Reuters-ს.
უკრაინის ლიდერმა წარმოადგინა რუკა, რომელზეც ნაჩვენებია მინერალური საბადოები, მათ შორის აღმოსავლეთ უკრაინაში მდებარე ზოლი, რომელიც შეიცავს იშვიათ ლითონებს, რომელთა დაახლოებით ნახევარი, როგორც ჩანს, ფრონტის ხაზის რუსეთის მხარეს მდებარეობს.
ზელენსკიმ განაცხადა, რომ უკრაინას ევროპაში ტიტანის უდიდესი მარაგები აქვს, რომელიც აუცილებელია ავიაციისა და კოსმოსური ინდუსტრიისთვის, ასევე ურანი, რომელიც გამოიყენება ბირთვულ ენერგიასა და იარაღის წარმოებაში.
„ყველაზე მეტად ამერიკელები დაგვეხმარნენ, ამიტომ ყველაზე მეტი მათ უნდა მიიღონ. და მათ უნდა ჰქონდეთ ეს პრიორიტეტი და ექნებათ კიდეც. ასევე მსურს ამ საკითხზე პრეზიდენტ ტრამპთან საუბარი“, – აღნიშნა მან.
უკრაინის ლიდერმა განაცხადა, რომ აუცილებელია, პირადად შეხვდეს ტრამპს, სანამ აშშ-ის პრეზიდენტი ვლადიმირ პუტინს შეხვდება, „სხვაგვარად ეს გამოიყურება როგორც დიალოგი უკრაინის შესახებ, უკრაინის გარეშე“.