მე არ ვთვლი, რომ ქართული ე.წ. ოპოზიცია არის „ქართული ოცნების“ ოპონენტი. ეს არის ჯგუფი ადამიანებისა, რომლებიც, როგორც მარიონეტები ისე იმართებიან იმ ევროპული ბიუროკრატიისგან, რომლის მხილებას „ქართული ოცნება“ და ახლა უკვე ამერიკის შეერთებული შტატები ცდილობს, – განაცხადა გადაცემაში „იმედი LIVE“ პარლამენტის გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ ქართულ ოპოზიციაზე საუბრისას.
„ესენი არიან ადამიანები, რომლებიც ტექსტს უწერენ ევროპარლამენტარებს იმიტომ, რომ გაუმარტივონ საქმე. ესენი არიან ადამიანები, რომლებიც იმართებიან. ანუ ესენი არიან თამაშის მონაწილეები, რომლებიც საკუთარი სამშობლოს დაკნინებას ცდილობენ უკვე რამდენიმე წელია და ცდილობენ გაატარონ ნარატივი, რასაც ჰქვია დაარწმუნონ საქართველოს მოსახლეობა, რომ მათი სამშობლო ანუ საქართველო, არის რაღაც მეორადი წარმონაქმნი და არსებობს სადღაც რაღაც უფრო უკეთესი ქვეყანა, ან უფრო საქართველოს მოყვარული ევროპარლამენტარი, რომელმაც უფრო კარგად იცის, მათ შორის ბალტიისპირელებმა გამოიჩინეს თავი, რომელმაც უფრო კარგად იცის რა სჭირდება ამ სახელმწიფოს.
რაც არ უნდა თქვან ჩვენმა ე.წ. ოპოზიციის წარმომადგენლებმა, ერთი რამ უკვე ნათელია, მათ საქართველოს მოსახლეობამ პასუხი არა თუ გასცა, მხოლოდ არჩევნებზე და „ქართულმა ოცნებამ“ ამდენი წლის შემდგომ 54% აიღო, მათი ნარატივი, მათი მავნებლობა გაცვდა, ამოჭამა მთლიანი რესურსი და აი ეს რეზოლუციები, ეს ცალკეული ევროპარლამენტარების გამონათქვამები არის მხოლოდ და მხოლოდ დარჩენილი იმისთვის რომ დღის წესრიგი შექმნან ჩვენი ეგრეთ წოდებული ოპოზიციისთვის, რომ ისინი უბრალოდ ადამიანებს არ დაავიწყდეთ“, – აღნიშნა მაია ბითაძემ.